Аҕыйах хонуктааҕыта Болугур нэһилиэгэр 2025 сылга олохтоох көҕүлээһиннэри өйүүр бырагыраамаҕа кыттыы боппуруоһун көрүү мунньаҕа ыытылынна. Нэһилиэнньэ куоластааһыныттан олох инники сайдыыта тутулуктааҕын дьон өйдүүр буоланнар олус көхтөөхтүк кыттаннар, саамай туһалаах диэбит бырайыактарын таллылар.
Мунньах иннигэр нэһилиэнньэҕэ GOOGLE форманан ыйытык ыытыллыбытыгар 403 киһи эппиэтин хаалларбыта. Ыйытыкка кыттыбыт дьонтон 55,3% ураһа тутуутугар куоластаатылар, 29,5% Крупская уулусса уота тимир остуолбаҕа көһөрүгэр санааларын уурбуттар, оттон сыбаалканы күрүөлээһиҥҥэ 11,2 %, атыҥҥа 4% куолас киирдэ.
Ыытыллыбыт мунньахха 169 киһи кыттыыны ылла. Улахан сүбэлэһии, ырытыы кэнниттэн 2025 сылга Аҕа дойду Улуу сэриитин 80 сыллаах үбүлүөйүн көрсө нэһилиэккэ Ураһа тутуутун олохтоохтор биир санаанан таллылар.
Андрей Петров.