Атырдьах 23 күнэ туох ханнык бэлиэ күннэринэн историяҕа хаалбытай? Бу туһунан манна ааҕан билсиҥ.
1382 с. — Москубаны Алтан Ордуу баһылыга Тохтамыш сэриилэриттэн көмүскүүргэ нуучча сирдэригэр аан бастаан тэргэннэри туһаммыттар. Ол эрээри үс хонон баран Тохтамыш сэриитигэр киирсэр Суздаль уонна Алын Новгород кинээстэрэ Москуба ааннарын кыргыһыыта суох аһан биэриҥ диэн тылларыгар киллэрбиттэрэ. Онон Москуба бэриммитэ.
1552 с. — Нуучча ыраахтааҕытын Уордаах Уйбаан сэриитэ Казань куораты төгүрүктээбит.
1906 с. — Николай II ыраахтааҕы нуучча бааһынайдарыгар 20 мөлүйүөн акр сири атыылыыр туһунан ыйаах таһаарбыт.
1913 с. — Копенгагеҥҥа Ганс Христиан Андерсен остуоруйаларын дьоруойугар Русалкаҕа мэҥэ туруорбуттар.
1935 с. — Москубаҕа Кириэмил башняларын икки бастаах хотойдорун биэс салаалаах сулустарынан солбуйарга Политбюро дьаһайбыт. 
1939 с. — Германия уонна Сэбиэскэй Сойуус сэриинэн саба түһүспэт туһунан дуогабар (пакт) түһэрсибиттэр. Дуогабарга Илин Европа дойдуларын үллэстибиттэрэ биллэр. Бу дуогабары туһанан Германия сүрүн өстөөхтөрүн Францияны уонна Сэбиэскэй Сойууһу утары биирдиилээн сэриилэһэр кыахтаммыта. Онтон Сэбиэскэй Сойуус сэриигэ бэлэмнэнэр кэми сүүйбүтэ.
1942 с. — Сталинградтааҕы кыргыһыы кэмигэр ньиэмэс аармыйата Волга өрүһүн кытылыгар тахсыбыт.
1956 с. — ССРС Миниистирдэрин Сэбиэтин Уурааҕынан Саха государственнай педагогика институтун оннугар Саха государственнай университета тэриллибит.
1973 с. — Швеция киин куоратыгар Стокгольмҥа табыллыбытах баан халааһына буолбут. Халааччылар 5 күн аманааттары (заложниктары) тутан олорбуттар, ол кэм иһигэр аманааттар атаҕастааччыларын сөбүлээн барбыттар эбит. Бу быһылаан «Стокгольм синдрома» диэн тиэрмини үөскэппит.
1989 с. — Ыллыыр өрөбөлүүссүйэ: Эстония, Латвия уонна Литва 2 мөлүйүөн олохтооҕо Вильнюс — Таллинн суолга илиилэринэн тутуһан 600 км усталаах тыыннаах субурҕа оҥорбуттар.
2011 с. — «Өлүөнэ турууктара» паарканы ЮНЕСКО-ттан кэлбит эспиэрдэргэ (Соҕуруу Кэриэйэттэн Ке Син Ху, Монголияттан Соранг Го) көрдөрбүттэр. 
Сахалыы бикипиэдьийэттэн оҥордо Артем ОСИПОВ