Амматааҕы О.П. Иванова-Сидоркевич аатынан оҕо сайдар киинин “Дьөһөгөй –сир эдэр хаһаайыннара” диэн бырайыагынан Бөтүҥ орто оскуолатын уолаттара сылгы хааччаҕар тахсан үлэни билистилэр.
«Дьөһөгөй-сир эдэр хаһаайыттара» диэн бырайыак Дойду Бэрэсидьиэнин Фондатын Гранын кыайыылааҕа буолар. Бөтүҥ орто оскуолатыттан бу бырайыагынан О.П.Иванова-Сидоркевич аатынан Амматааҕы айар сайдыы киинэ көҕүлээһининэн «Дьөһөгөй» кулуубка орто бөлөх кылаастар үөрэнээччилэрэ 15 уол дьарыктанабыт. Ол чэрчитинэн нэһилиэкпит чугаһыгар баар хочоҕо сылгы мэччийэр сирин баран билистибит, чинчийэр сыаллаах буорун, уутун матырыйаал быһыытынан ыллыбыт.
Ол кэнниттэн “Таҥха” Самсоновтар дьиэ кэргэн бааһынай хаһаайыстыбаларын сылгы базатыгар «Хааччах» диэн сиргэ баран кэллибит. Бу сир Бөтүҥ нэһилиэгиттэн 4 км тэйиччи баар. Манна биһиги сылгы кыстыыр отун састаабын үөрэтэн көрөр сыаллаах эмиэ от, уу, буор анализка диэн ыллыбыт. Өссө идэһэ кэмигэр биэттэн убаһаны хайдах арааран ылар, сэлэлээһин туһунан, сылгы күрүөтүн-хаһаатын, станок туһунан бэрт элбэх саҥаны билэн-көрөн киирдибит. Бу олус туһалаах бырайыак кыттыылаахтара сибиэһэй салгынынан тыынан, астынан салгыы инники үлэбит былаанын торумнаан кэллибит.
Максим НЕУСТРОЕВ. Айдын ИВАНОВ, «Платформа» медиакиин чилиэннэрэ, 8-с кылаас үөрэнээччилэрэ