Бөтүҥ уонна Амма орто оскуолатын үөрэнээччилэрэ Амматааҕы О.П. Иванова-Сидоркевич аатынан айар сайдыы киинэ үлэлэтэр “Дьөһөгөй – сир эдэр хаһаайыннара” бырайыак чэрчитинэн Строд аатынан хаһаайыстыбаҕа сылгы иитиитин билистибит.
«Дьөһөгөй-сир эдэр хаһаайыттара» бырайыак – бу Дойду Бэрэсидьиэнин фондатын Гранын кыайыылааҕа буолар. Биһиги оскуола бу бырайыакка кыттыһан сылгы иитиитин кытта чугастык билсэбит. Ол курдук айар сайдыы киинин иһинэн «Дьөһөгөй» кулууп тэрийиитинэн В.Г. Короленко аатынан Амма 1 №-дээх оскуолатыттан биэс үөрэнээччи уонна Н.Е.Иванов аатынан Бөтүҥ агро хайысхалаах оскуолатыттан уон үөрэнээччи буолан алгыстаах Абаҕа сиригэр баар И.Я.Строд аатынан хаһаайыстыба сылгытын собуотугар баран ыалдьыттаатыбыт. Бөтүҥтэн биһигини салайааччыбыт Самсонова Туйаара Петровна илдьэ барбыта.
Тиийбиппит собуокка үлэ күөстүү оргуйа турар эбит. Убаһаны биэлэриттэн быысааһын, станокка киллэрэ-киллэрэ араартааһын, вакцинация уонна чиптээһин оҥоро сылдьаллар. «Сибирскай язва», «Лептоспироз» вакциналарын хайдах биэрэллэрин көрдүбүт-иһиттибит. Үлэһиттэр биһигини үөрэ-көтө көрүстүлэр. Икки бэтэринээр, биир-биир үүртэлээн киллэрэр үлэһит уонна бөтүҥнэр биир дойдулаахпыт, племзоотехник Егоров Олег Олегович буолан станок нөҥүө элбэх да элбэх сылгыны араартыыллар эбит. Саха ыалдьытымсах буоларын быһыытынан биһигини элбэх битэмииннээх, иҥэмтэлээх тоҥ убаһа этинэн күндүлээбиттэрин бары астына амсайдыбыт. Бэрт элбэх саҥаны биллибит, уопсай билиибит-көрүүбүт кэҥээтэ. Күһүҥҥү сынньалаҥмытыгар биир туһалаах, умнуллубат, үтүө күнү атаардыбыт, сыалбытын-сорукпутун ситистибит.
Ариан ТАТАРИНОВ, «Платформа» Медиа киин чилиэнэ,
Хаартыскаҕа түһэрдэ Эрнест ДЬЯКОНОВ