Бүгүн Арассыыйа бэрэсидьиэнин талар быыбар бастакы күнэ саҕаланна. Сарсыарда 8 чаастан Амматааҕы 44-с быыбардыыр учаастакка куоластааһын көхтөөхтүк ыытылла турар.
Учаастактааҕы быыбар хамыыһыйатын бэрэссэдээтэлэ Лидия Максимова иһитиннэрбитинэн, 11:30 чаас туругунан уопсайа 238 киһи куоластаата, ол иһиттэн эбии испииһэккэ 33, дьиэҕэ 14. Бу күн биир долгутуулаах түгэнэ 18 саастаах Аина Федорова аан бастакытын быыбарга кыттан, быыбар хамыыһыйатыттан өйдөбүнньүк бэлэх тутта. Быйылгы быыбар уратыта диэн Амма улууһугар Олоҥхо сылынан, итиэннэ өрөспүүбүлүкэтээҕи Олоҥхо ыһыаҕа ыһылларынан быыбар хамыыһыйатын чилиэттэрэ бары сахалыы мааны таҥастаах үлэлэригэр таҕыстылар. Маныаха улууспут салайааччылара, түөлбэ олохтоохторо, тэрилтэ үлэһиттэрэ эмиэ сахалыы киэргэнэн кэлэннэр «Бырааһынньыгынан, быыбар күнүнэн!» диэн бэйэ-бэйэлэрин истиҥник эҕэрдэлэһэн, көхтөөх гражданскай позицияларын көрдөрдүлэр.
Санатан эттэххэ, быыбар кулун тутар 15-17 күннэригэр ыытыллар.
Вера ИВАНОВА