Алдьархай хантан ааҥнаан кэлэрэ, хайдах күөрэйэн кэлэрин ким да күүппэт буоллаҕа. Амма улууһун тыатын хаһаайыстыбатын биир улахан тэрилтэтэ «Кэскил» хаһаайыстыбатын гараһа уокка былдьанан олохтоохтору, үлэһиттэри аймаабыта. Маннык түгэҥҥэ хаһан баҕарар кыра да көмө, өйөбүл далаһа курдук буолар.
«Ахсынньы 23 күнүгэр биир дойдулаахтарым Амма улууһун II Чакыр нэһилиэгэр «Кэскил» хаһаайыстыба улахан гараһа уокка былдьанан икки улахан, 2020, 2022 сыллаах МТЗ тыраахтырдара умайан хаалла. Үлэлии турар тэрилтэ биирдэ ытыһын маннык соттон хаалара улахан охсуу буоллаҕа дии. Төһөлөөх көлөһүннэрин тоҕон, үлэлээн-хамсаан, сүүрэн-көтөн тиэхиникэлэрин ылбыттара буолла? Аны туран, кыс ортото… Салайааччы Александр Алексеевич Карманов, Чакыр нэһилиэгин баһылыга Семен Николаевич Григорьев уонна Амма улууһун дьаһалтата, баһылык Степан Николаевич Кузьмин буолан кэпсэтэн, сүбэлэһэн муус устар ыйга диэри болдьоһон МТЗ-82.1 балочнай тыраахтары, ону таһынан «Евромакс-1200» погрузчик уонна онно холбонор куопсук иэс бэриллэрин курдук кэпсэтэн, бүгүн «КЭСКИЛ» ХЭУо салайааччыта тырахтарыыһын кытта кэлэн тиэхиникэлэрин сүүрдэн илдьэ бардылар»,- диэн этэр урбаанньыт, дойдутун дьонугар куруутун көмө тирэх буолар Руслан Федотов.
«Амма олоҕо» хаһыат.