Бүгүн, алтынньы ый 4 күнүгэр, Чакыр нэһилиэгин дьонугар-сэргэтигэр ураты үөрүүлээх түгэн үүннэ. Өр сылларга күһүн, саас хаайтарыы кэмигэр туһанарбытыгар «Ангара 530» диэн аэролодка кэлэн үөрүүлээх быһыыга-майгыга дьон -сэргэ ортотугар күлүүһэ туттарылынна.
Амма улууһун 14 нэһилиэгиттэн Чакыр соҕотох куула олохсуйбут нэһилиэгинэн биллэр. Онон күһүн, саас өрүһү туоруурга кэккэ ыарахаттары көрсөбүт. Ас-үөл, эмп-томп аҕалыыта, онтон даҕаны атын кыһалҕа сыл ахсын турар. Ону өйдөөн улуус дьаһалтата, баһылык Степан Кузьмин үп көрөн, Чакыр нэһилиэгин баһылыгын солбуйааччы Иннокентий Тарасов Иркутскай уобалаһы кытта ыкса үлэлэһэн аэролодка 2 ый кэриҥэ таҥыллан, оҥоһуллан тиэллэн кэллэ. Аэролодка сыаната 940 000 солк., бырысыаба 168 000 солк.
Онон Чакыр нэһилиэгин дьоно – сэргэтэ, өр сылларга сытыытык турбут кыһалҕабыт быһаарыллыбытынан, олоххо киирбитинэн, ыра санаабыт туолбутунан, сүрдээҕин үөрдүбүт, долгуйдубут, астынныбыт.
Аэролодкабыт уһун үйэлээх, дьон кыһалҕатыгар көмө буоллун диэн алҕыаххайыҥ.
Мария Шепелева.