Аммаҕа аан бастаан «Тарбаахаптыы астыахха» эдэр асчыттар икки ардыларыгар улуустааҕы күрэс ыытылынна. Манна 7 кыттааччы дьүүллүүр сүбэ иннигэр бэйэлэрин сатабылларын, маастарыстыбаларын көрдөрдүлэр.
Эдэр асчыттар күрэхтэһиилэрин Ирдэбил быһыытынан оҕолор астаах саламааты уонна убаһа этин кытта икки гарниры буһардылар.
Дьүүллүүр сүбэ бэрэссэдээтэлинэн Амма 2 №-дээх орто оскуолатын остолобуойун технолог асчыта Александра Семенова, чилиэннэринэн оскуолалар бэрэстэбиитэллэрэ үлэлээтилэр.
Түмүккэ кыайыылааҕынан Чакыр 8 кылаастаах оскуолатын үөрэнээччитэ Матвей Шадрин (салайааччыта Тихон Матвеев) таҕыста. Иккис миэстэни Абаҕаттан 10 кылаас үөрэнээччитэ Николай Осипов (салайааччыта Наталья Федорова), үһүс миэстэни Амма 1 №-дээх орто оскуолатын 10 «а» кылааһын үөрэнээччитэ Александр Калашников (салайааччыта Мария Сибирякова, Ульяна Путренко) ыллылар. Кыайыылаах асчыт ахсынньы 5-6 күннэригэр өрөспүүбүлүкэҕэ киэҥник биллэр асчыт Иннокентий Тарбахов 80 сааһын туолар үбүлүөйдээх күрэхтэһиитигэр кыттар чиэскэ тигистэ.
Матвей Шадрин, Чакыр орто оскуолатын 8 кылааһын үөрэнээччитэ, күрэхтэһии кыайыылааҕа: «Бастакы кылааска үөрэнэр эрдэхпинэ дьиэбэр эрдэ кэлэрим. Төрөппүттэрим иккиэн учуутал буоланнар хойутууллара, ол иһин аан бастаан 6 сааспыттан астаан саҕалаабытым. Маҥнай алаадьыны уонна миини буһаран холоммутум. Сыыйа-баайа аһылыкпын араас тумалаан тупсаран барбытым. Ийэм ас арааһын үөрэтэрэ, аҕам таһырдьа буһарыллар плову, этинэн аһылыгы онтон да атыттары үөрэтэрэ. Маны таһынан ютуб көмө буолар. Ону тэҥэ рестораннарга, кафеларга сырыттахпына сөбүлээбит астарбын буһаран иһэбин. Билигин бурдук аһы, ордук чебурегы, балык бөрүөгүн, алаадьыны, араас запеканкалары, сушины, рулеттары, салааттары, ыһаары астары, французтуу эти, гарнирдары, миини онтон да атыны араастаан тумалаан буһарабын. Бүгүҥҥү күрэхтэһиигэ бэйэбит тэллэйбитин туһанан саламааты, рагуну, хортуоппуй пюретын бэлэмнээтим, ирииһи кытайдыы ыһаарылаатым, соуспун эмиэ оннук оҥордум. Бүгүн аан бастаан маннык күрэхтэһиигэ кытынным уонна аһым табылынна диэн үөрэбин».
Күрэхтэһиини Амма 2 №-дээх орто оскуола остолобуойугар ыытыллыбытынан үөрэх салататын аатыттан дириэктэр Григорий Карповка, остолобуой үлэһиттэригэр, оскуола кэлэктиибигэр улахан махталбытын тириэрдэбит!
Алтана Артемьева