Тыа сиригэр олорор ыал түбүгэ элбэх. Олортон биир саамай тыын суолталааҕа уһун кыһыны туоруур , ыраас ууну иһэр -муус ылыыта буолар. Сэтинньи маҥнайгы күннэриттэн саҕалаан бары нэһилиэктэргэ эр дьон муус ылан түбүгүрэллэр. Бэйэ иһэригэр эрэ буолбакка, саастаах дьоҥҥо, соҕотох ийэлэргэ, итиэннэ байыаннай дьайыыга сылдьар байыастар дьиэ кэргэттэригэр муус ылан биэрии үтүө үгэскэ кубулуйда.
Ол курдук, бэҕэһээ Чапчылҕан нэһилиэгин эр дьоно үтүө бачыымы кэспэккэ, сэрии сылын оҕолоругар, байыастар дьиэ кэргэттэригэр, соҕотох олорор кыаммат пенсионердарга, уопсайа 24 ыалга субуотунньугунан муус ыллылар.
-Субуотунньукка кыттыыны ылбыт уолаттарбытыгар Гаврил Леонтьевка, Гаврил Максимовка, Николай Птицыҥҥа, Герман Кардашевскайга, Михаил Пестеревкэ, Николай Чириковка, Афанасий Уваровка, Дмитрий Трифоновка, Аренто Харитоновка, Никифор Тимофеевка, Афанасий Кузьмиҥҥа, тимир көлөлөөх суоппардарбытыгар Павел Ивановка, Алексей Ивановка, Руслан Никитиҥҥэ уонна оскуола, уһуйаан, ОДьКХ, олохтоох дьаһалта салайааччыларыгар туора турбакка улахан үлэҕэ кыттыспыттарыгар барҕа махталбытын тиэрдэбит,- диэн нэһилиэк баһылыга Дьулустан Юшков социальнай ситим нөҥүө кэпсэтиибитигэр этэр.
“Амма олоҕо” хаһыат.