Сыл бүтэн, ааспыты анааран түмүк таһаарар кэм үгэнэ. Чапчылҕаннар бэҕэһээ саҥа дьыллааҕы кэнсиэртэрин көрдөрө таарыйа үчүгэй үлэлээхтэри, үрдүк ситиһиилээхтэри бэлиэтээтилэр. Нэһилиэк аҕа баһылыга Дьулустаан Юшков чулууттан чулууларга анал ааттары иҥэрэн эҕэрдэлээтэ, наҕараадалары туттарда.
Ааһан эрэр сыл өйтөн сүппэт өрөгөйүн кимнээх биллилэр диэн билсиэх. Ол курдук, “Бастыҥ общественник” – Александр Карамзин, “ОДьКХ бастыҥ үлэһитэ” — Дмитрий Пестерев, “Сыл бастыҥ спортсмена” — Арина Федорова, “Эбии үөрэхтээһин бастыҥ педагога” — Айталина Артемьева, “Сыл бастыҥ устудьуона” – Гарри Сдвижков, “Сыл бастыҥ үөрэнээччитэ” – Антон Чириков, “Бастыҥ эдэр ыал” – Дмитрий уонна Лилия Петровтар, “Тыа хаһаайыстыбатын бастыҥ үлэһитэ” – Василий Герасимов, “Бастыҥ педагог” – Анна Степанова.
Түөлбэлэр икки ардыларыгар ыытыллыбыт спартакиадаҕа “Кытыл” түөлбэ быйыл даҕаны иннин кимиэхэ да биэрбэтэ. Үһүс сылларын чөмпүйүөннээннэр 50 тыһыынча солкуобайга сертифкаты туттулар. Иккис миэстэҕэ “Озернай” тиксэн 30 тыһыынча солкуобайынан наҕараадаланна. Үһүс миэстэни ылбыт “Ыаллыылар” түөлбэҕэ 20 тыһыынча солкуобай бэрилиннэ.
Чапчылҕан нэһилиэгин сайдыытыгар сыратын-сылбатын уурбут дьону ойуччу тутан эҕэрдэлээн туран түөскэ анньыллар бэлиэлэри биэрдилэр. Быйыл үс киһи маннык наҕараадаҕа тигистэ, ол курдук, Наталья Алексеева, Мария Леонтьева уонна Ольга Максимова.
Итини сэргэ нэһилиэк ытык олохтооҕо Мария Павловна Лазарева туйгун үөрэнээччигэ диэн анаабыт стипендиятын быйыл 10 кылаас үөрэнээччитэ Ярослав Ефимовка туттарда.
Мас тардыһыыга эдэрдэргэ Арассыыйа күрэҕэр чөмпүйүөннээн баран үргүлдьү устудьуоннарга ортолоругар турнирга баран хаардыы хааман кэбиспит Гарри Сдвижковка “Кэнэҕэһин да уолбут Амматын аатын ааттатыа, дойдутун суон сурахтыа” диэн туран 60 тыһыынча солкуобайга сертификат туттарда.
Олег Егоров.