Чапчылҕан нэһилиэгин орто оскуолатын аактабай саалатыгар Кыһыл сулус уордьан кавалера Филипп Лобановка анаммыт «Герой аата умнуллубат» диэн кинигэ сүрэхтэниитэ буолла. Кинигэни «Чапчылҕан нэһилиэгэ» муниципиальнай тэриллии үбүлээн таһаарда. Барыта 7 түһүмэхтээх, 176 сирэйдээх. «Офсет» бэчээтин дьиэтигэр 160 тираһынан бэчээттэннэ. Кинигэ Амма улууһун Чапчылҕан нэһилиэгиттэн төрүттээх, Кыһыл Сулус уордьан кавалера Филипп Лобанов төрөөбүтэ 70, хорсун быһыыны оҥорбута 50 сылларыгар ананар. Кинигэҕэ Филипп Лобанов бииргэ төрөөбүттэрин, доҕотторун, аймахтарын, учууталларын ахтыылара, анабыл хоһооннор, хаһыакка тахсыбыт матырыйааллар, үйэтитии үлэлэр, библиографическай ыйынньык киирдилэр.
Оскуола аактабай саалатыгар өлүүнү кыайбыт комсомолец Филипп Лобановка аналлаах кинигэ быыстапката, үөрэммит партата анал көрдөрүүгэ турда.
Үөрүүлээх бэлиэ тэрээһиҥҥэ Филипп Лобанов бииргэ төрөөбүттэрэ, сиэн балтылара, бырааттара, бииргэ үөрэммиттэрэ, Амма, Соморсун, Мээндиги, Чапчылҕан нэһилиэгин олохтоохторо уонна кинигэ тахсыытыгар үлэлэспит дьон көхтөөх кыттыыны ыллылар. Сүрэхтэниини Чапчылҕан нэһилиэгин сүрүннүүр бибилэтиэкэрэ Алена Семенова иилээн-саҕалаан ыытта. Эҕэрдэ тылы Чапчылҕан нэһилиэгин баһылыга Дьулустан Юшков, улуус дьаһалтатын социальнай эйгэ уонна ыччат бэлиитикэтин сүрүннүүр исписэлииһэ Туяра Смирникова, Чапчылҕан орто оскуолатын дириэктэрэ Давид Давыдов, кинигэ тахсыытыгар үлэлэспит Марфа Гаврильева, улуустааҕы үөрэх дьаһалтатыттан Диана Макарова, кинигэ библиографическай ыйынньыгын оҥорбут Амматааҕы Күннүк Уурастыырап аатынан киин библиотека ааҕааччыны кытта салаа кылаабынай бибилэтиэкэрэ Елизавета Сидорова, академик Л.В. Киренскэй аатынан кыраайы үөрэтэр түмэл сэбиэдиссэйэ Вера Бессонова эттилэр. Маны сэргэ кинигэ тахсыытыгар матырыйаалынан күүс-көмө буолбут Филипп Лобанов бииргэ төрөөбүттэрэ, аймах-билэ дьоно чугас киһилэрин туһунан истиҥ-сылаас тылынан ахтан-санаан ааспыттарын мустубут дьон сэргээн иһиттилэр. Эдэркээн уол хорсун быһыытыгар анаммыт дууһа кылын таарыйар хоһооннор элбэхтэр. Бу күн кинигэҕэ киирбит хоһооннор ааптардара Арассыыйа суруйааччыларын сойууһун чилиэнэ, поэт Семен Капитонов уонна олохтоох ааптар, өрөспүүбүлүкэтээҕи “Уран тыл оһуора” литературнай түмсүү чилиэнэ Татьяна Семенова-Татыйаас Филипп Лобановка анаабыт истиҥ-иһирэх хоһооннорун ааҕан иһитиннэрдилэр. Кинигэ матырыйаалларын эрэдээксийэлээн, тутан-оҥорон, таҥан улуустааҕы “Амма олоҕо” хаһыат 1 категориялаах эрэдээктэрэ Вера Иванова бэчээккэ бэлэмнээн оҥордо. Кини Филипп Лобанов курдук номох буолбут биир дойдулаахпыт туһунан чугастык билиһиннэрэр кинигэҕэ үлэлэлээбиттэн астынарын уонна киэн туттарын этэр. Үөрүүлээх тэрээһиҥҥэ Чапчылҕан нэһилиэгин баһылыга Дьулустан Юшков нэһилиэк дьаһалтатын аатыттан кинигэҕэ үлэлэспит дьоҥҥо Махтал суругу кытта, саҥа күн сирин көрбүт буруолуу сылдьар кинигэни бэлэх уунна.
“Аммабыт улууһугар үөрүүлээх түгэн тосхойдо. Ол курдук Филипп Лобанов төрөөбүтэ 70 сылыгар «Герой аата умнуллубат, Филипп Лобанов» диэн кинигэ сүрэхтэниитэ олус үчүгэйдик ааста. Мин Чапчылҕан нэһилиэгин аҕа баһылыгар Дьулустан Юшковка уонна кинигэ күн сирин көрөрүгэр үлэлэспит туох баар дьоҥҥо барҕа махталбын биллэрэбин” – диэн СӨ култууратын үтүөлээх үлэһитэ Семен Капитонов санаатын үллэһиннэ.
Артем ОСИПОВ