Чапчылҕан нэһилиэгэр „Үҥкүү уостубат абылаҥа“ диэн улуустааҕы үҥкүү күрэҕэ 55 саастарыттан үөһээ саастаахтар ортолоругар тэриллэн олус сэргэхтик ааста. Кэлбит кэлэктииптэр эдэрдии эрчимнээхтик, үҥкүү кэрэ алыбар ылларан үҥкүүлээн тэйдилэр, бииртэн биир кэрэ үҥкүүлэр тахсан истилэр. Тэрээһин кэмигэр „төгүрүк остуол“ ыытылынна.
„Тэрээһиммит наһаа үчүгэйдик уонна киэҥ хабааннаахтык барда диэн бэйэм да астынным. Бу аҥардас үҥкүү эрэ күнэ буолбакка, бары өттүнэн дьоҥҥо, бэйэбит нэһилиэкпит аҕам саастаах дьонун үлэтин-хамнаһын, сатабылларын, дьоҕурдарын, нэһилиэктэрин туһугар ыытар үлэлэрин уонна бары биир санаанан салайтаран үлэлииллэрин улуус таһымыгар көрдөрүү буолла. Бу бырайыагы тэрийбит култуурабыт дьиэтин хореограбара Сангима Васильевна Романоваҕа баҕа санаа бастыҥын, махтал маанытын этэбит, инники үлэтигэр өссө үрдүк ситиһиилэри, саҥа саҕалааһыннары баҕарабыт“, — диэн Чапчылҕан нэһилиэгин бэтэрээннэрин Сэбиэтин чилиэнэ Нина Устинова сырдатар.
Үҥкүү күрэҕэр уопсайа 10 кэлэктиип Абаҕаттан, Соморсунтан, Амматтан, Бөтүҥтэн, Мээндигиттэн, Амма Наахараттан, Чакыртан, Сатаҕайтан, Чапчылҕантан кытыннылар. Күрэх түмүгүнэн лауреаттар, дипломаннар уонна анал ааттар бигэргэннилэр. Ону сэргэ муҥутуур кыайыылаах быһаарыллынна. Дьэ эрэ кимнээх улуустааҕы үҥкүү күрэҕин кыайыылаахтара буоллулар?
Күрэх лауреаттарынан Амматтан “Күндүл” үҥкүү кэлэктиибэ (сал. Лидия Шакарова) 1-кы степен, Мээндигиттэн “Айылыгы” (сал. Марина Удина) 2-с степен, Амма Наахараттан “Чэмэлиинэ” (сал. Светлана Захарова) 3-с степен, дипломаннарынан Чапчылҕантан “Далбар” үҥкүү кэлэктиибэ (сал. Сангима Романова) 1-кы степен, Бөтүҥтэн “Алгыс” (сал. Мария Никитина) 2-с степен, Чакыртан “Күбэйэ” (сал. Светлана Новикова) 3-с степен буоллулар. Маны сэргэ кыра формалаах үҥкүүлэргэ 1-кы степеннээх лауреатынан Сатаҕайтан “Тэтим” үҥкүү кэлэктиибэ (сал. Сардана Варфоломеева), 2-с степеннээх лауреатынан Амматтан Анна Васильева уонна Роман Жирков (сал. Сахаяр Дорофеев) ааттаннылар. Онтон дипломанынан Амматтан Ольга Федорова уонна Степан Нестеров буоллулар. Анал аат хаһаайыннарынан “Благородный возраст” – Соморсунтан “Элэһин эбэлэрэ” үҥкүү бөлөҕө (сал. Арсен Софронов), “Яркий костюм” Бөтүҥтэн “Алгыс” үҥкүү бөлөҕө (сал. Мария Никитина) уонна “Оригинальный номер” Мээндигиттэн “Айылгы” (сал. Марина Удина) буоллулар. Онтон күрэх муҥутуур кыайыылаахтарынан Абаҕаттан «Түһүлгэ» үҥкүү бөлөҕө таҕыста. Салайааччы Елена Тритонова.
“Маны сэргэ күрэх кэмигэр „төгүрүк остуол“ тулар кэпсэттибит. Онно иһиттэххэ үгүс нэһилиэк түмсүүтүн үлэтэ уонна кыһалҕата майгыннаһар эбит. Ол курдук сүрүнэ бэтэрээннэр уонна аҕам саастаахтары бэлэмнииргэ хореограф тиийбэтигэр, нэһилиэк орто саастаах араҥата, ол эбэтэр 45-55 диэри эдэр да кырдьаҕас да өттүгэр хабыллыбакка олорон хаалыытыгар уонна эдэр ыччат саастаах дьоҥҥо сыһыаныгар. Кэпсэтиигэ өссө быйыл Арассыыйаҕа Дьиэ кэргэн уонна Сахабыт сиригэр Оҕо саас сылларын чэрчитинэн „чөл олохтоох, бигэ туруктаах, элбэх оҕолоох тыа ыала — Дойду бигэ туруга“ диэн этиини биһирии истэн, бу этиигэ сөп түбэһэр нэһилиэк аайы баар биһиги биир дойдулаахтарбытын чиэстээн, кинилэр хайдах дьаһанан, дьиэ-уот, сүөһү — ас тутан, оҕо-уруу төрөтөн, үөрэттэрэн, дьон сэргэ убаастыыр гына иитэн таһааран, бэйэлэрин удьуордаан тыа ыала буолбуттарын киэц эйгэҕэ сырдатан, кэпсээн, көрдөрөн сыл түмүгүнэн чиэстиэҕин диэн санааҕа кэллибит“, — Нина Егоровна санаатын этэр.
Бу тэрээһиҥҥэ аҕам саастаахтар „Солобуода“ үҥкүү кэлэктиибэ кэлэн эмиэ кыттыыны ылан, кини биир көхтөөх кыттааччыта, быйыл 12-с сылын үҥкүү кэрэ эйгэтигэр сылдьар Анна Андреевна Васильеваны чиэстээтилэр.
„Үҥкүү күрэҕэ, бырааһынньыга үрдүк таһымҥа барда. Биһигини бальнай үҥкүүһүттэри ыҥыран иккис сылгытын кытыннарбыттарыгар махтал. Үҥкүү күрэҕэ элбэхтик ыытыллар эрээри, ол барыта народнай үҥкүүһүттэргэ диэн буолар. Биһиги бальнайдар бэйэбит бэйэбитигэр арыыланан хаалан хаалааччыбыт, хаалабыт даҕаны. Онон бу үҥкүү күрэҕэ буолбутуттан үөрдүбүт, сынньанныбыт, бэйэбитин көрдөрдүбүт. Дьону да көрдүбүт, билэр дьоммутун көрсөн үөрүү- көтүү буолла. Киһиэхэ кыра да наада. Чапчылҕаннар түмсүүлээхтэрин көрдөрдүлэр. Кэлин эдэр эрчимнээх исписэлиис, хореограф Сангима Романова кэлэн бу маннык үҥкүү курдук кыраһыабай бырааһынньыктары тэрийэрэ наһаа үчүгэй. Саастаах дьон киэргэнэн, таҥнан үҥкүүлээн, үөрэн- көтөн үйэбит өссө уһуур. Кэрэ бырааһынньыгы тэрийбит, сүүрбүт-көппүт дьоҥҥо, чуолаан Сангима Васильевнаҕа, музыка ыытар операторга, техүлэһиттэргэ, ас астаан аҕалбыт үлэһиттэргэ, сиэрдээхтик сыаналыыр дьүүллүүр сүбэҕэ барыгытыгар өссө да үрдүк ситиһиилэри, табыллыылары баҕарабыт“, — диэн «Үнкүүлүүр Солобуода» бальнай үҥкүүһүттэрин кэлэктиибэ махтал тылларын аныыр.
Бу күн өссө Чапчылҕан нэһилиэгин уран тарбахтаах аҕам саастаахтарын оҥоһуктарын быыстапката туран ыалдьыттар, күрэхтэһии кыттыылаахтара сэҥээрэ көрдүлэр.
„Амма олоҕо“ хаһыат