Ааспыт өрөбүл күн Чапчылҕан түөлбэлэрэ бильярдка күрэхтэстилэр. Анаан-минээн дьаныһан дьарыктанар, оонньуур бильярдист суох да буоллар, түөлбэлэр “Сыһыаннаах киһибит кини буолаарай” диэбит дьоннорун туруордулар. Нэһилиэк аҕа баһылыга Дьулустаан Юшков: “Күрэхтэһиини үчүгэйдик оонньооччулары сүүмэрдии таарыйа ыыттыбыт. Кыайбыттар улуус спартакиадатыгар Чапчылҕан аатын-суолун көмүскүөхтэрэ”, — диэн күрэх соругун билиһиннэрдэ.
Бильярд күрэҕэ сыллааҕы спартакиада чэрчитинэн буолла. Ол эрэн үс эрэ түөлбэ кыттан улахан хайдыһыы таҕыста. “Сайдыы” уонна “Ыаллыылар” киирсибэккэлэр “хортуоска” ыллылар. Дьиҥинэн, бу икки түөлбэ иккис миэстэни хайа баҕарар былдьаһар кыахтаах, очукуоларынан араа-бараа ахсааннаах испит түөлбэлэр этэ. Ол оннугар “Озернай” иккис миэстэҕэ тахсар эрэлэ улаатан, дьонуҥ күлүктэригэр имнэннилэр. “Озернай” бильярдка бастакы миэстэни ылла. Иккис миэстэҕэ “Мир”, үһүскэ “Кытыл” тигистэ.
Спартакиадаҕа билиҥҥи туругунан, бастакы миэстэни көрдө-көрбүтүнэн “Кытыл” түөлбэ эрэллээхтик буурдаан иһэр. Бүтэһик күрэх – “Веселые старты” хаалла. Балар манна “хортуосканы” да ыллахтарына ситтэрбэт туруктаахтар. “Кытыл” очукуота – 25. Иккис миэстэҕэ “Озернай” адьас ыы муннунан кэтиллээри ыга сылдьар. Түөлбэ бильярдка бастаан балаһыанньатын лаппа тупсарда, очукуолара – 30. 34 очукуолаах “Сайдыы” уонна 33 очукуолаах “Ыаллыылар” ыкса аалса иһэллэр. Түөлбэлэртэн “Мир” 43 очукуолаах сылдьар.
Онон, Чапчылҕан спартакиадатын түмүгэ иннэ-кэннэ дьайҕаран эрэр. “Кытыл” түөлбэ үһүс төгүлүн чөмпүйүөн аатын сүгэр эрэлэ улахан. Уоннааҕы түөлбэлэр, бүтэһик күрэххэ, “Веселые стартка” бириистээх миэстэлэри былдьаһыахтара.
Олег Егоров.