Чапчылҕан нэһилиэгэр бэлиэ күн ааста. Олохтоох ФАП дьиэтигэр бу тутууну көҕүлээбит Алексей Кармановка махтанан бу туһунан өйдөбүнньүк бэлиэни астылар.
«Биһиги нэһилиэкпит төһө да улуус кииниттэн чугас буоллар, олохтоохтор ыарыйдылар да Аммаҕа киирэр кыахтара суох. Онон 2004 сыллаахха Александра Петровна Шестакова баһылыктыы олордоҕуна, оччолорго биһиги нэһилиэк территориятыгар баар «Саханефтегазсбыт» аһаҕас акционернай уопсастыба дириэктэринэн үлэлии олорбут Алексей Дмитриевич Карманов тус көҕүлээн саҥа ФАП дьиэтэ тутуллан, 2005 сыллаахха үлэҕэ киирбитэ. Олохтоохтор онтон ыла олус абыранан олороллор. Онон бу үтүө дьыаланы оҥорбут Алексей Дмитриевичка махтал бэлиэтин -өйдөбүнньүк табличканы ФАП дьиэтигэр туруоран үөрүүлээхтик астыбыт. Бу тэрээһиммитигэр Александра Петровна Шестакова, баһылык солбуйааччытынан, онтон баһылыгынан үлэлээбит Николай Афанасьевич Ксенофонтов, ФАП киириитигэр өҥөлөөх Николай Герасимович Гурьев, Амма киин балыыһатын кылаабынай бырааһын солбуйааччы Дмитрий Николаевич Васильев кыттыыны ыллылар.
Бары сылаас чэйдээх остуол тула олорон истиҥник кэпсэттибит. Алексей Дмитриевичка нэһилиэкпит биир сүрүн наҕараадатын, «Чапчылҕан нэһилиэгин сайдыытыгар кылатын иһин» диэн түөскэ анньыллар бэлиэни туттардым. Мин бэйэм бу көрсүһүүттэн элбэҕи биллим, аҕам саастаах дьоммуттан сүбэлэри ыллым»,- диэн Чапчылҕан нэһилиэгин баһылыга Дьулустан Юшков иһитиннэрэр.
«Амма олоҕо» хаһыат