«Чэчир» уһуйаан кырачааннарыгар аналлаах түмэли арыйда

Аан дойдуга бэлиэтэнэр Музей күнүн көрсө Соморсун нэһилиэгин «Чэчир” оҕо сайдар киинэ 65 сыллаах үбүлүөйдээх сылыгар, өрөспүүбүлүкэҕэ Оҕо саас сылынан биир сонун бырайыагын олоххо киллэрдэ. Уһуйаан  икки кыра бөлөхтөрүн иитээччилэрэ, үлэһиттэрэ бэйэлэрин корпустарыгар нуучча уонна саха омуктарын олохторун-дьаһахтарын көрдөрөр муннук тэрийэн саҕалаан бараннар, салгыы ситэрэн, сайыннаран анал хоско түмэл тэрийэн арыйдылар.

Айар бөлөх тэрийээччитэ, иитээччи Марфа Белолюбская бырайыак туһунан маннык кэпсиир:
«Уһуйааммыт иһинэн оҕо сайдар эйгэтин тэрийиигэ үһүс сылын төрөппүтү кытта үлэни көдьүүстээхтик тэрийиигэ бөлөхтөрүнэн күрэх тэриллэр. Ол курдук бастакы сыл сахалыы иитиигэ эйгэни тэрийиигэ биһиги бөлөх бастаабыппыт. Бу маннык тэрээһин ыытыллан саҥаттан саҥа бырайыактары үлэҕэ киллэрэргэ көдьүүс буолла. Ол иһигэр бүгүн арыллыбыт түмэлбит. Манна иккис корпуска үлэлиир бары үлэһиттэр, биир санаанан салайтаран, түбүктээх үлэбит быыһыгар, кыра-кыратык ыпсаран, ситэрэн бу түмэлбитин олоххо киллэрдибит. Ордук иитээччи көмөлөһөөччүтэ Ньургуйаана Михайловна Окорокова олус талааннаах, элбэх оҕолоох ийэ. Кини сүрүн идеялары угааччыбыт, киэргэтээччибит буолар. Түмэлбит хайысхата дойдубут икки бырааттыы омугун олоҕун-дьаһаҕын иитэргэ-үөрэтэргэ туһаайыллар”.


Дьоро күн айар бөлөҕү нэһилиэк дьалтата, уһуйаан салалтата эҕэрдэлээтилэр, баҕа санаа бастыҥын анаатылар.

Надежда Белолюбская.

Читайте дальше