Дьон-сэргэ сөбүлээн атыылаһар сахалыы тыыннаах иһиттэрин оҥорор «Чороон 21-с үйэ» тэрилтэ Дьокуускай куорат килбэйэр киинигэр бэйэтин бородууксуйатын атыылыыр саҥа маҕаһыынын аста.
Биир дойдулаахпыт Софья Трофимовна Попова салайар тэрилтэтэ Лермонтов уулусса 49 нүөмэрдээх атыы -эргиэн дьиэтигэр бэйэтин өссө биир маҕаһыынын аһар үөрүүлээх малааһына буолан ааста. Бэлиэ күҥҥэ үөрүүнү үллэстэ Амма улууһун социальнай боппуруостарга солбуйааччыта Ньургуйаана Ивановна Илларионова кэлэн эҕэрдэтин тириэртэ. Кини Софья Трофимовна саха иһитин тэнитиигэ, тарҕатыыга, урукку канону тутуһан оҥорор, онон саха култууратын киэҥ эйгэҕэ тарҕата сылдьар биир ситиһиилээхтик үлэлиир салайааччы буоларын, Олоҥхо ыһыаҕар “Үс дойду ытык иһитэ” диэн олус интэриэһи тарпыт күрэҕи тэрийбитин, маннык айымньылаахтык үлэлиир биир дойдулаахпытын киэн туттарбытын бэлиэтээн эппитэ. Маны сэргэ малааһын күнүн улуус култуураҕа управлениетын салайааччыта Иван Федорович Иванов сэргэхтик ыытан Софья Трофимовнаҕа эмиэ эҕэрдэтин, махталын тириэртэ.
Кэлбит ыалдьыттар, эрэллээх атыылаһааччылар эмиэ истиҥ эҕэрдэлэрин, махталларын тириэрдэн, дьэ олус табыгастаах сиргэ маҕаһыын баар буолбутуттан, Чорооннор иһиттэрин куруутун атыылаһалларын, бэлэххэ үөрэ көтө туттаралларын, анаан-минээн мунньалларын, бу тэрилтэ сүгүрүйээччилэрэ да буолалларын эппиттэрэ. Ол курдук Сунтаартан сылдьар ыалдьыт куруутун «Чороон 21 үйэ» хампаанньа иһитин анаан-минээн атыылаһарын, хампаанньа иһиттэрэ бэйэлэрин көрүҥнэринэн, хаачыстыбаларынан, бары урукку саха иһиттэрин каноннарыгар толору эппиэттииллэрин тоһоҕолоон бэлиэтээбитэ. Софья Трофимовна мустубут дьоҥҥо тэрилтэ туойунан иһитин көрүҥүн элбэтиигэ үлэлэһэрин, ону сэргэ маастар-кылаастары ыыталларын, Саҥа дьылы көрсө саҥа бородууксуйа тахсыаҕын туһунан иһитиннэрбитин бары үөрэ уонна астына иһиттибит.
Бука барыгытын Дьокуускай куорат киинигэр аһыллыбыт, “Чороон 21 үйэ” саҥа маҕаһыыныгар үөрэ-көтө кэлэн атыылаһаргытыгар ыҥырабыт. Биир дойдулаахпытын өссө төгүл бу бэлиэ күнүнэн истиҥник эҕэрдэлиибит.
Татьяна СТЕПАНОВА