Амма Наахара нэһилиэгэр «Социальнай-правовой десант» кэлэн үлэлээн барда. Сарсыарда үлэ чааһа саҕаланыаҕыттан олохтоох дьаһалта дьиэтигэр исписэлиистэр нэһилиэнньэни кытта үлэни ыыттылар.
Улуус баһылыгын социальнай боппуруоска солбуйааччы Нюргуяна Ивановна Илларионова хамаандатыгар Амма улууһун дьарыктаах буолуу киинин салайааччыта Лена Кимовна Вензель, Аҕа дойдуну көмүскээччилэр Государственнай фонда социальнай координатора Саргылана Семёновна Константинова, Арассыыйа социальнай фондатын Амма оройуонугар салайааччыта Алима Юсубовна Черноградская, Элбэх функциялаах киин исписэлииһэ Валерия Семёновна Макарова, сокуоннай сааһын ситэ илик оҕолор кэмитиэттэрин бэрэссэдээтэлэ Виктория Ивановна Феоктистова, бэтэрээннэр сэбиэттэрин бэрэссэдээтэлэ Мария Романовна Захарова, Амма улууһун Ис дьыалатыттан сокуоннай саастарын ситэ илик оҕолор дьыалаларын инспектора Лилия Никодимовна Никифорова сырыттылар.
Ньургуяна Ивановна уопсай нэһилиэк боппуруоһунан үлэтин ыытта, эһиилги сыллааҕы Улуу Кыайыы 80 сылын көрсө улуус былаанын Мария Романовналыын билиһиннэрдэ.
Олохтоохтор үс чаас иһигэр көхтөөх кыттыыны ыллылар. Ол курдук 77 киһи толкуйдатар боппуруостарыгар туһааннаах эппиэт ыллылар. Маны таһынан Виктория Ивановна уонна Лидия Никодимовна оскуола үрдүкү кылааһын үөрэнээччилэрин кытары көрүстүлэр, улаатан иһэр оҕолорго туһалаах үөрэҕи тэрийдилэр.
Маннык үтүмэн үлэлэр ыытыллаллара ыраах сытар нэһилиэктэргэ дьоҥҥо үөрүүнү, айаҥҥа чэпчэтиини, олоххо эрэли үөскэтэр. Дьон туһугар айар-тутар үлэ өссө кэҥээн истин!
Ирина Корякина – Олесова.