Улуу Кыайыы 79 сылын көрсөр өрөгөйдөөх, ытык бырааһынньыгы Абаҕа олохтоохторо үрдүк таһымнаахтык бэлиэтээтилэр. Биир умнуллубат тэрээһининэн сэрии кэмин сылларыгар үгүс оҕо дьылҕатын быыһаабыт, Абаҕа детдома тэриллибитэ 81 сылыгар анаммыт митинг буолла.
Бу күн, ол кэмнэргэ детдом дьиэтигэр олорбут оҕолор, билиҥҥи кэмҥэ ытык кырдьаҕастарбыт ыалдьыт буолан кэлэннэр, оччотооҕу кэмнэри санаан эмиэ да уйадыйан, эмиэ да үөрэн ыллылар. Дьэ уонна күммүт чаҕылхай түгэнинэн, Илья Семенов – Ураанай уола суруйуутугар, Евгения Попова туруоруутугар “Сырдык аартык” испэктээгэ “Маска” оҕо театральнай студиятын, Абаҕа орто сокуолатын үөрэнээччилэрин кыттыылаах Абаҕатааҕы Духуобунас киинин үрдүк сыанатыгар сүрэхтэннэ.
Испэктээги, оччотооҕу кэмҥэ детдомҥа олоро сылдьыбыт ытык кырдьаҕастарбыт көрөннөр олус диэн уйадыйдылар, мэктиэтигэр оҕо саастарыгар төннүбүккэ дылы буоллулар. Бу испиктээк, Абаҕа нэһилиэгин эрэ дьонугар буолбакка, бүтүн улуус, өрөспүүбүлүкэ дьонугар олус суолталаах, дириҥ ис хоһооннох үлэ буолар. Детдому тэрийбит, үгүс оҕо дьылҕатын быыһаабыт, детдом бастакы дириэктэрэ Трифонов Георгий Васильевич аатын үйэтитэр, сырдатар сыалтан, кини уола Трифонов Анатолий Георгиевич сылын аайы оскуола выпускниктарыгар стипендия аныыр. Онон, бу үтүө үгэһи, сырдык санааны хас биирдии үүнэн эрэр кэнчээри ыччат билиэх, өйдүөх тустаах диэн санааттан оҥоһуллубут үлэ үрдүк таһымҥа сыаналанна. Хас биирдии кэлбит көрөөччү олуһун диэн уйадыйан, оҕолор хайдахтаах курдук оруолларыгар киирэн итэҕэтиилээхтик туттан-хаптан оонньуулларын олус диэн сөҕө-махтайа биир тыынынан, иһийэн көрөн олордулар, хабыллар ытыс тыаһын бэлэхтээтилэр.
Суруйда Юлия Яковлева.
Хаартыскаҕа түһэрии: Богдан Гермогенов.