Дьиэ кэргэнинэн кэлэн быыбарга кытталлара кэрэхсэбиллээх

Аммаҕа быыбар күн Арассыыйа биллэриллибит Дьиэ кэргэн сылын чэрчитинэн, ону сэргэ Аммаҕа Олоҥхо сылынан быыбардыыр учаастакка дьиэ кэргэнинэн сахалыы таҥнан кэлэн ытык иэстэрин элбэх ыал толоро сылдьар. Кинилэр истэригэр Амма нэһилиэгиттэн эдэр ыаллар Слепцовтар түөрт оҕолорун кытта быыбардыыр учаастакка кустук курдук куоһанан кэлэн бардылар.


Елена уонна Иннокентий Слепцовтар түөрт оҕолорун илдьэ Аммаҕа быйыл ыытыллар Олоҥхо Ыһыаҕын көрсө бары дьиэ кэргэнинэн сахалыы таҥастаах кэлэн кыттыбыттара олус кэрэхсэбиллээх буолла. Ыал ийэтэ Елена Спиридоновна РИК “Автодор” үп-экэниэмикэ отделын сүрүн исписэлииһинэн үлэлиир. Онтон ыал аҕата Иннокентий Николаевич, Амматааҕы уот ситимин сибээһин идэлээх үлэһитэ. Улууспут биир бастыҥ общественнига, тэрилтэтин идэлээх сойууһун бэрэссэдээтэлэ, Оҕолоро  Павел Амма №1-дээх орто оскуолатын 9-с кылааһын, Коля 7 -с “б” кылааһын үөрэнээччилэрэ буолаллар. Уолаттар иккиэн волейболга өрөспүүбүлүкэ чемпионнара. Кыыстара Наташа эмиэ Амма № 1 — дээх оскуолатыгар 2-с “б” кылааска үөрэнэр, үөрэх туйгуна, олимпиадалар кыттыыылаахтара, «Күндүл» үҥкүү ансаамбылын көхтөөх кыттааччыта. Онтон кырачаан икки саастаах Милена «Хатыҥчаана» уһуйаан иитиллээччитэ. Эдэр, олоххо көхтөөх ыал быйыл бииргэ олорбуттара 15 сыллара. Маннык ханна баҕарар бииргэ сылдьар, иллээх, уйуктаах, чөл олохтоох, сүрдээх сэргэх, барыга кыайыылаах- xотуулаах эдэр ыалларга бары кэрэни баҕарабын.

Нюргуяна Илларионова

Читайте дальше