Бөтүҥ нэһилиэгин Дьалабына бааһынатыгар ардах-хаар ортотугар бэлиэ тэрээһин ыытылынна. Улуус биир бөдөҥ хаһаайыстыбата саҥа техниканы ылбытын сахалыы сиэринэн алҕаан бэлиэтээтэ.
“Бу “Вектор-410” диэн аныгы комбаймыт өрөспүүбүлүкэ тыатын хаһаайыстыбатын министиэристибэтин нөҥүө техническэй модернизациялыыр лизинг бырагырааматынан кэллэ. Ол эбэтэр биэс сылга төлүүбүт. Сыаната аҕаларын киллэрэн туран 18 мөлүйүөнтэн тахса солкуобай. Мантан 95 бырыһыанын министиэристибэ, 5 бырыһыанын хаһаайыстыба төлүүр. Онон бу улахан көмө буолар. Ол эбэтэр маннык улахан техниканы хаһаайыстыба кредиккэ киирбэккэ үлэтин көдьүүстээхтик ыытарыгар судаарыстыба өртүттэн өйөбүл көрүллэр. Өрөспүүбүлүкэ үрдүнэн маннык биэс комбайн кэллэ. Ол иһиттэн бу биирэ Амма улууһугар, “Бөтүҥ” хаһаайыстыбатыгар кэллэ. Билигин баар комбаймытын хас да сыллааҕыта аукциоҥҥа кыттан ылбыппыт. Ону сэргэ улуус көмөтүнэн “Кормопроизводство” диэн бырагыраамаҕа кыттан БТЗ диэн улахан тыраахтыр, икки сеялка уонна икки МТЗ-1221 диэн тыраахтыр ылбыппыт. Дьэ ол техникаларбытынан бу 500-тэн тахса гектарбытыгар эбиэс уонна ньэчимиэн ыһабыт. Инникитин өссө ыһыы, хомуур үлэтигэр үлэлиир сеялка, культиватор, дискатор курдук эбии соһуллар техникалары ылыахпытын баҕарабыт. Маны сэргэ хаһаайыстыба бары салааларыгар сүүрэр КАМАЗ массыыналар бу техническай модернизацияҕа киирэллэрэ буоллар, өссө көмө буолуо этэ. Онон бу тыа хаһаайыстыбатын сайыннарыыга, бөҕөргөтүүгэ баар бырагыраамалар салгыы үлэлиэхтэрин наада. Кинилэр көдьүүстээхтэрэ уонна туһалаахтара көһүннэ. Бу туһунан бары хаһаайыстыбалар бигэргэтиэхтэрин сөп”, — диэн “Бөтүҥ” ТХПК бэрэссэдээтэлэ Дмитрий Левин санаатын үллэстэр.
Чахчы да сайдыылаах үйэҕэ олорон, бэйэ бородууксуйатын оҥорон таһаарар салаабытыгар маннык кыамталаах улахан техникалар анал бырагырааманан кэлэллэрэ биллэн туран тирэх буолаллара саарбаҕа суох. Тыа хаһаайыстыбатын улууһа буоларбытынан, улуус салалтата бу өртүгэр эмиэ өйөбүл буолар, сыллата үбүлээһини улаатыннарар. Бэлиэ тэрээһиҥҥэ баһылык э.т. Василий Бураев кыттан, саҥа комбайн күлүүһүн эдэр үлэһит Артур Яковлевка туттарда.
“Биһиги улуус тыа хаһаайыстыба салаатын куруутун өйөөн кэллэ. Холобура ааспыт сылга 20 мөл. солк бюджеттэн көрбүт эбит буоллахпытына, кэлэр сылга ону 5 мөл. солк улаатыннарар баҕалаахпыт. Оннук соругу баһылыкпыт Степан Николаевич Кузьмин туруорар. Онно үлэлэһэ сылдьабыт. Өрөспүүбүлүкэҕэ үлэлиир бырагырааманы көдьүүстээхтик туһанан, улууспут хаһаайыстыбаларыгар быйыл 13 МТЗ тыраахтыр кэлэрин ситистибит. Манна даҕатан эттэххэ, тыа хаһаайыстыбатын управлениетын кытта сүбэлэһэн, “Кормопроизводтсво” бырагырааматыгар маннык МТЗ тыраахтырдары ылыыны киллэрэри туруорсубуппут өйөнүллэн, билигин онон элбэх улуус туһанна. “Бөтүҥ” хаһаайыстыбатыгар сэргэ “Болугур” хаһаайыстыбатыгар сотору кэминэн эмиэ 17 мөл. солкуобайдаах аныгы тыраахтыр кэлиэхтээх. Бу курдук биһиги бурдугунан дьарыктанар хаһаайыстыбаларбытын былааннаан саҥа техникаларынан хааччыйыыга үлэлэһэбит”, — диэн этэр Василий Иванович.
Саҥа кэлбит комбайн кэлбитин бэлиэтиир үөрүүлээх тэрээһиҥҥэ Бөтүҥ нэһилиэгин ытыктанар киһитэ, кыраайы үөрэтээччи Алексей Нестерев техника этэҥҥэ үлэлииригэр диэн алгыс тылын этэн аал уотун аһатта. Төһө да ардах сатыылаатар, тыа сирин үлэһит дьоно үлэни-хамнаһы чэпчэтэр, түргэтэтэр техника кэлбитин уруйдаан-айхаллаан көрүстүлэр. Кинилэр үөрүүлэригэр тыа хаһаайыстыбатын управлениетын салайааччыта Ион Кононов, Бөтүҥ нэһилиэгин баһылыга Алексей Никитин кыттыһан, эҕэрдэ тылларын эттилэр. Маны тэҥэ кэллиэгэлэрин үөрүүлэрин Строд аатынан хаһаайыстыба бэрэссэдээтэлэ Василий Тимофеев, “Амма” АУО генеральнай дириэктэрэ Роман Спасьев үллэһиннилэр.
“Саҥа техника үчүгэй бөҕө буоллаҕа дии. Бэйэм саҥа маннык улахан техникаҕа олордум. Ол иннинэ манна уолаттарга сыбааркаҕа, комбайн оҥоһуутугар үлэлэһэр этим. Аҕа табаарыһым, уоппуттаах Иван Юрьевич Сутаков саҥа комбайҥа олорон бииргэ үлэлиэххэ диэбитин ылынан бу уруулга олордум. Икки күн устата быстаран баран ардах түһэн мэһэйдээн кэбистэ. Саҥа комбайын быһар иэнэ 7 миэтэрэ. Барыта автоматика. Уматыгын, арыын бүтэн эрэрин, бункер туоларын барытын этэн, көрдөрөн иһэр. Күн-дьыл туран биэрдэр, икки күнүнэн бу хаалбыт бааһынабытын түргэнник бүтэриэ этибит”, — диэн эдэр комбайнер Артур Яковлев уруулун тутан олорон санаатын үллэстэр.
Дьэ бу курдук судаарыстыбаттан көрүллэр олус көдьүүстээх бырагыраамалар баар буоланнар, бэйэ бородууксуйатын оҥорон таһаарар тыа хаһаайыстыбатын салаата өссө да сайда, көмөттөн тирэх ылан кыаҕыран, сайда турдун диэн тэрээһин бары кыттыылаахтара баҕа санааларын тириэртилэр.
“Амма олоҕо” хаһыат