Амма улууһун баһылыга Степан Кузьмин уонна баһылык тутууга солбуйааччыта Виктор Смирников Дьокуускай куоракка улууска улахан тутуулары ыыта сылдьар тэрилтэ салалталарын кытта көрсөн кэпсэттилэр, боппуруостары чуолкайдастылар.
“Биһиги Дьокуускай куоракка командировкабытыгар бастатан туран Аммаҕа киириигэ тутулла турар 360 миэстэлээх лиссиэй дьиэтин уонна 100 миэстэлээх интернаты тута сылдьар “Полюс 21” диэн тутуу тэрилтэтин дириэктэрэ Александр Иванович Егоровы кытта көрүстүбүт. Билэргит курдук социальнай ситимнэринэн быйыл бу эбийиэк салгыы тутуута тохтуурун туһунан иһитиннэрии барбыта. Ол гынан баран кэпсэтиилэр түмүктэринэн, тутуу барар ньымата уларыйан, ол эбэтэр муниципальнай чааһынай партнерство быһыытынан буолбакка, эбийиэк тутуллубутун кэннэ судаарыстыба атыылаһан ылыытынан барарын курдук үлэлээн диэн Ил Дархан Дьаһала бу олунньу 5 күнүгэр таҕыста. Ол биллэн туран биһигини олус үөрдэр. Тэрилтэ дириэктэрэ үлэни тохтоппокко, салгыы ыытан, бу сыл бүтүүтэ тутан үлэҕэ киллэрэр былааннаах. Ол курдук бу көрсүһүүбүтүгэр матырыйаал таһыытын былааннарын, хайдах быһыылаахтык үлэ сааһыланан барарын туһунан кэпсэттибит. Ону сэргэ бырайыакка бэйэбит этиилэрбитин киллэрэн биир санааҕа кэллибит. Онон лиссиэй дьиэтэ салгыы тутуллуо.
Бу кэнниттэн биир саамай улахан тутуубутун ыыта сылдьар Юрий Юрьевич Попов генеральнай дириэктэрдээх “Основа” ХЭТ тэрилтэҕэ сырыттыбыт. Бу тутуу 2025 сыл бүтүүтэ үлэҕэ киириэхтээх. Ону кинилэр толору өйдүүллэр уонна ылыммыт эбээһинэстэрин чиэстээхтик толоруохпут, дьон-сэргэ, өрөспүүбүлүкэ, улуус салалтатын эрэлин түһэн биэрбэт гына үрдүк хаачыстыбалаах тутууну түмүктүөхпүт диэн этэллэр. Бу тутууну таһынан тэрилтэ өссө Бөтүҥ уонна Эмис нэһилиэктэригэр быйыл иккис этаба түмүктэниэхтээх “Гражданнары хаарбах дьиэттэн көһөрүү” бырагырааманан тутулла турар элбэх кыбартыыралаах дьиэлэри тутуохтаах. Ол курдук Бөтүҥҥэ 20 кыбартыыралаах дьиэ бырайыагын түмүктээн экспертизаҕа киирээри сылдьаллар. Үлэ хаамыытын бытаардыбат наадаттан кулун тутар ый ортотуттан матырыйаалларын таһан саҕалыылларын, сыбаайаларын кутан бэлэмнии сылдьалларын эттилэр. Онтон Эмис нэһилиэгэр 5 кыбартыыралаах дьиэни эмиэ түмүктүөхтэрэ”, — диэн Виктор Владимирович сырдатта.
Санатан эттэххэ, быйыл улууспутугар Инфраструктураны сайыннарыы сыла биллэриллэн турар. Онон хаһааҥҥытааҕар да тутуу, тупсаран оҥоруу ураты болҕомтоҕо тураллар.
“Амма олоҕо” хаһыат