Дьулус Бубякин “Кроссфит эти хааны бары өртүнэн эрчийэр”

Соторутааҕыта Сочи куоракка Бүтүн Арассыыйатааҕы ГТО оонньууларын бэстибээлэ буолан ааста. Манна элбэх киһиттэн талыллан, Саха сирин хамаандатыгар киирэн биир дойдулаахпыт, Эмистэн силистээх-мутуктаах Дьулус Бубякин баран ситиһиилээхтик кыттан, бэйэтин бөлөҕөр иккис бириистээх миэстэни ылан кэллэ. Кинини кытта сибээскэ тахса сырыттыбыт.


“Биһиги өрөспүүбүлүкэбитигэр быйыл функциональнай многоборье федерацията тэриллибитэ. Федерация бэрэссэдээтэлэ өрөспүүбүлүкэбит Бырабыыталыстыбатын бэрэссэдээтэлин солбуйааччы Анатолий Аскалонович Семенов буолар. Бу ГТО бэстибээлэ ГТО сөргүтүллүбүтэ 10 уонна ГТО баар буолбута 50 сылыгар ананан ыытылынна. Манна спорт араас көрүҥҥэ барыта киирэр. Ол курдук сүүрүү, штанга көтөҕүүтэ, ыстаҥа, эрдинии, тардыныы, сиртэн сытан эрэ анньыныы, быһатын элбэх көрүҥ. Боростуойдук быһаардахха Кроссфит эрчиллиилэрэ киирэллэр. Бэйэм кросфитынан дьарыктаммытым үс сыл буолла. Бастаан онлайн талыы буолбута. Ол кэнниттэн ыҥырыы туппутум. Миигин тэрилтэм өйөөн, уоппуска биэрэн, кыттан кэллим, онон үлэ биэрээччибэр Саха сирин социальнай пуондатыгар улахан махталллаахпын. Онтум ситиһиилээх буолбутуттан үөрэбин. Ол курдук 18-тан 39 саастарыгар диэри категорияҕа иккис миэстэни ыллым.

 

Уопсайа категориябар 33 киһи баар этэ. Үс күн устата күрэхтэстибит. Уопсайа 6 комплекс буолла. Түмүктүүр күрэххэ талыллан-талыллан, очколарынан көрөн 8 киирбитэ. Мин бэйэм бу кроссфит көрүҥүн талбытым диэн бастаан доҕотторум ыҥырбыттара. Түргэн-тарҕан, тимири кытта үлэлиири сөбүлүүр киһиэхэ оруобуна сөп түбэһэр этэ. Биир эрэ эрчиллии буолбакка, элбэх эрчиллиилэрдээх. Атаххыттан саҕалаан, санныгар, сискэр тиийэ дьарыктыыгын. Быһатын былчыҥнарын бары өттүнэн сайдаллар. Онон сөбүлээн дьарыктана сылдьабын. Дьарык наар уларыйа сылдьар, биир эрэ буолбатах. Онон эдэр ыччаттары кроссфитынан дьарыктаналларыгар ыҥырабын”, — диэн Дьулус сырдатта.

Дьулус Бубякин 2016 Сыллаахха ХИФУ историческай факультетыгар “история международных отношений” идэтийэн бүтэрбитэ. Ол кэнниттэн Санкт Петербург куоракка экономика уонна салайыы институтугар үөрэнэн “судаарыстыбаннай муниципальнай салайыы” салаатыгар үөрэнэн 2018 сыллаахха магистр буолбута. Билигин СӨ социальнай фондатыгар пенсияны салайар, аныыр управлениеҕа отдел салайааччытын солбуйааччытынан ситиһиилээхтик үлэлии сылдьар. Дьулус хамаандатын кытта бэҕэһээ дойдуларыгар көтөн кэллилэр. Кинилэри аэропортка федеарция бэрэссэдээтэлэ, СӨ Бырабыыталыстыбатын бэрэссэдээтэлин солбуйааччы Анатолий Семенов кыттыылаах дэлэгээссийэ көрүстэ.

Биир дойдулаахпытын Арассыыйа таһымнаах күрэххэ Сахатын сирин аатын ааттаппытынан истиҥник эҕэрдэлиибит!

“Амма олоҕо” хаһыат

Читайте дальше