Улууспут киинигэр Саха сирин норуоттарын спортивнай оонньууларын көрсө тутуллубут Сахаачча аатынан элбэх функциялаах спорт саалатыгар улуус доруобуйаларынан хааччахтаах дьонун икки ардыларыгар спортивнай бэстибээл буолан ааста. Бу тэрээһин доруобуйаларынан хааччахтаах дьон декадаларын чэрчитинэн спорт 3 көрүҥэр ыытылынна. Амма, Алтан, Абаҕа, Бөтүҥ, Болугур, Мээндиги, Соморсун, Эмис, Чакыр, Чапчылҕан нэһилиэктэриттэн 7 хамаанда кытынна. Сорох толорута суох хамаандалар бэйэ-бэйэлэригэр холбоһон күрэхтэстилэр.
Доруобуйаларынан хааччахтаах дьон декадаларын уонна бэстибээл үөрүүлээх чааһын улууспут Аҕа баһылыгын социальнай боппуруостарга солбуйааччы Нюргуяна Ивановна Илларионова арыйда, эҕэрдэтин уонна баҕа санаатын тириэртэ. Улуустааҕы уопсастыба бэрэссэдээтэлэ Светлана Софронова кыттаччыларга махтанна уонна дьулууру-тулууру, кыайыыны-хотууну баҕарда.
Күрэх судьуйаларынан Сахаачча аатынан оҕо спортивнай оскуолатын тренердэрэ Антон Пермяков, Валерьян Бессонов — дуобакка, Максим Семенов, методист-иструктор Айыына Петрова — остуол тиэнниһигэр, 3 көлүөнэ оскуолатын волонтердара Валерия Пахомова, сахалыы остуол оонньууларыгар өрөспүүбүлүкэтээҕи категориялаах судьуйа Галина Карамзина хабылыкка, хаамыскаҕа үлэлээтилэр. Остуол тиэниһигэр судьуйаларга адаптивнай спорт көрүҥнэригэр тренер Екатерина Сивцева көмөлөстө. Кылаабынай судьуйанан улуустааҕы доруобуйаларынан хааччахтаах дьон уопсастыбатын адаптивнай спорт көрүҥнэригэр исписсэлииһэ Семен Николаевич Килбясов үлэлээтэ.
Уопсайа көрүҥнэринэн миэстэлэр маннык үллэриннилэр:
Остуол тенниһигэр
Дьахталларга 7 кыттааччыттан:
1 миэстэ — Зоя Иннокентьевна Павлова (Амма);
2 миэстэ — Мария Афанасьевна Лыткина (Алтан);
3 миэстэ — Зинаида Алексеевна Филиппова (Болугур).
Эр дьоҥҥо 9 кыттааччыттан:
1 миэстэ — Афанасий Афанасьевич Абрамов (Чакыр);
2 миэстэ — Федор Викторович Гурьев (Бөтүҥ);
3 миэстэ — Петр Евсеевич Устинов (Болугур).
Дуобакка
Дьахталларга 2 дуоскаҕа 9 кыттааччыттан:
1 миэстэ — Матрена Еремеевна Федорова (Амма);
2 миэстэ — Лидия Матвеевна Егорова (Эмис);
3 миэстэ — Елена Дмитриевна Устинова (Абаҕа).
Эр дьоҥҥо 1 дуоскаҕа 10 кыттааччыттан:
1 миэстэ — Иван Иванович Бураев (Амма);
2 миэстэ — Ньургун Степанович Непомнящий (Бөтүҥ);
3 миэстэ — Гаврил Аркадьевич Филиппов (Мээндиги).
Сахалыы остуол оонньууларыгар (хабылыкка, хаамыскаҕа)
Дьахталларга 8 кыттааччыттан:
1 миэстэ — Октябрина Васильевна Неустроева (Бөтүҥ);
2 миэстэ — Любовь Иннокентьевна Харитонова (Болугур);
3 миэстэ — Маргарита Николевна Лазарева (Соморсун).
Эр дьоҥҥо 6 кыттааччыттан:
1 миэстэ — Алексей Алексеевич Устинов (Бөтүҥ);
2 миэстэ — Алексей Николаевич Матвеев (Амма);
3 миэстэ — Павел Филиппович Филиппов (Мээндиги).
Миэстэлэспит спортсменнар кырааматаларынан, мэтээллэринэн уонна кубоктарынан наҕараадаланнылар.
Хамаанданан үһүс миэстэни Чакыр, Чапчылҕан, Мээндиги холбоһуктаах, иккиһи Амма нэһилиэгин хамаандалара ыллылар. Муҥутуур кыайыылааҕынан, ол эбэтэр бастакы миэстэни Бөтүҥ хамаандата ылан көһөрүллэ сылдьар кубогы нэһилиэктэригэр илдьэ бардылар. Эһиилги сыллааҕы спорт бэстибээлэ кыайыылаахтар нэһилиэктэригэр Бөтүҥҥэ ыытылларыгар уураахтанна, хабыллар ытыс тыаһынан доҕуһуолланна.
«Бу буолан ааспыт спорт бэстибээлэ биһиги улууспутугар доруобуйаларынан хааччахтаах дьон декадатын үөрүүлээх арыллыытын быһыытынан бэрт сэргэхтик ааста. Дьоммут ыраах айаны аахсыбакка сүрдээҕин кэлэ сатаатылар, көхтөөхтүк кытыннылар. Декада чэрчитинэн араас тэрээһиннэр ыытыллыахтара. Ол курдук, төгүрүк остуоллар, саҥарар кинигэ сүрэхтэниитэ, оҕолорго уонна төрөппүттэргэ интеллектуальнай оонньуу буолуохтара. Түмүк тэрээһиммит ахсынньы 6 күнүгэр Алгыс сынньанар кииҥҥэ ыытыллыаҕа.
Нэһилиэк баһылыктарын социальнай боппуруостарга солбуйааччылара, социальнай үлэһиттэр бэйэлэрин нэһилиэктэрин доруобуйаларынан хааччахтаах дьонун сылга биирдэ буолар улахан тэрээһиммитигэр өйөөн-убаан, болҕомтоҕо ылан кытыннарыахтара, сэргэхситиэхтэрэ диэн эрэнэбин«, — диэн улуустааҕы доруобуйаларынан хааччахтаах дьон уопсастыбатын бэрэссэдээтэлэ Светлана Софронова санаатын үллэстэр.
Дьулуурдаах, олоххо тардыһыылаах, чөл олоҕу, бигэ туругу инники күөҥҥэ тутар дьоммутунан биһиги киэн туттабыт. Декадабыт үтүө көрдөрүүлээх түмүктэннин, өрүүтүн ситиһии, сырдык санаа арыаллаатын, чэгиэн-чэбдик буолуҥ диэн алҕыыбыт!
Татьяна АТЛАСОВА.