Эдэр ырыаһыт аатын үйэтитиигэ ырыа күрэҕэ үрдүк таһымҥа ааста

Сулҕаччы нэһилиэгин Сэргэ-Бэс бөһүөлэгэр  эдэр ырыаһыт Иван Удин аатын үйэтитэр «Санаам тугу кэпсиирин, ырыа гынан ыллыыбын…» диэн ааттаах аһаҕас ырыа күрэҕэ икки күн устата буолан ааста. Күрэх кылгас эрээри чаҕылхай олоҕу олорон ааспыт биир дойдулаахпыт, талааннаах ырыаһыт Иван Удин сырдык аатын үйэтитэр сыаллаах төрөөбүт улууһугар Аммаҕа, Сэргэ-Бэс бөһүөлэгэр эдэр ыччат ортотугар 2-с төгүлүн ыытылынна.


Күрэххэ Сахабыт сирин араас муннуктарыттан эдэр ыччат түмсэн ылбаҕай ырыалары бэлэхтээн, ырыа түһүлгэтин төрүттээтилэр. Ол курдук Орто Халыма, Алдан, Үөһээ Бүлүү, Хаҥалас, Мэҥэ Хаҥалас, Чурапчы, Нам, Амма улуустарыттан, Дьокуускай куораттан уонна Хатастан барыта 24 кыттааччы кытынна. Тэрийээччилэр Сулҕаччы нэһилиэгин дьаһалтата (баһылык Артем Степанов), Х. Максимов аатынан культура киинэ (дириэктэр Жанна Максимова), культура киинин  Сэргэ-Бэстээҕи филиала (сэбиэдиссэй Светлана Федотова) уонна Иван Удин төрөппүттэрэ Филипп Филиппович, Мария Михайловна Удиннар. Кыайыылаахтары быһаарарга уопуттаах дьүүллүүр сүбэ үлэлээтэ. Ол курдук  СӨ култууратын үтүөлээх үлэһитэ Ольга Судинова, СӨ култууратын туйгуна, Х. Максимов аатынан культура киинин уус-уран салайааччыта Мичийэ  Матвеева, СӨ култууратын туйгуна Мэҥэ Хаҥалас улууһун Мэлдьэхси нэһилиэгин култуура киинин дириэктэрэ Мотрена  Сыромятникова, Аан дойдутааҕы “С песней по Азии” күрэх Гран при хаһаайката, элбэх өрөспүгүбүлүкэтээҕи ырыа күрэхтэрин кыайыылааҕа Светослава Неустроева үлэлээтилэр.

Икки күннээх күрэх түмүгүнэн Гран при хаһаайынынан  Орто Халыматтан кэлбит кыттааччы Анатолий Гуляев буолла уонна  Иван Удин төрөппүттэрэ туруорбут бириистэрин тутта.

Күрэх  лауреаттарынан  Айыына Харабаева (Мэнэ Хаҥалас, Төхтүр), Александр  Карманов (Алдан улууһа),  Петр Пестерев (Хаҥалас улууһа) буоллулар. Онтон дипломаннарынан  Елена Александрова  (Сэргэ-Бэс),  Варвара Орлова  (Чурапчы), Максим Григорьев (Амма) ааттаннылар.  Маны сэргэ күрэх анал аат хаһаайыннара билиннилэр. Ол курдук  Нам улууһуттан Илларион Пестерев “Көрөөччү биhирэбилэ”, Амматтан Николай Пухов “Уйбаанныы уратытык”,  Нам улууһуттан  Марина Охлопкова “Күрэх арыйыыта” ,  Үөһээ Бүлүүттэн Марфа Степанова “Амма мелодистарын ырыатын толоруу”  уонна ийэтин Мария Михайловна  бииргэ үөрэммит оҕо сааһын доҕоро Иннокентий Бурнашов анал бирииһин,  Чурапчыттан Матрена Пермякова “Күрэх кэрэхсэлэ”,  Алтантан  Сергей Захаров “Күрэх эрэлэ” уонна эдьиийдэрэ Кузьмина Акулина Гаврильевна анал бирииһин,  Хаҥаластан Петр Пестерев “Үрдүк сценическай культура”, Амматтан Валерий  Кириллин “Дьиэрэй ырыам дуораана”,   Чурапчыттан Варвара Орлова “Тэтимнээх толорооччу”,  Амматтан Максим  Григорьев “Төрөөбүт дойдуга таптал”, Хатастан Туяра Бурнашова “Ураты ис эйгэлээх”, Сэргэ Бэстэн  Елена Александрова  “Кэрэ куолас уонна Дьокуускайдааҕы Аграфена Дмитриевна Макарова аатынан культуура уонна искусство колледжын анал бирииhин,  Намтан  Виктория Баишева «Ырыа куттаах ырыаhыт” уонна   ийэтин аймахтара “Сүөдэр сиэттэрэ”  диэн  анал бириистэрин,  «Кэскиллээх ырыаhыт” Мээндигиттэн Яна Данилова, «Туйаара» ырыа ансаамбылын анан бирииhин  Амматтан Олег Егоров,  бастакы учуутала Агнесса Дмитриевна Максимова дьиэ кэргэнин анал бирииhин Мээндигиттэн Валерия Анисимова, ийэтэ Мария Михайловна бииргэ устудьуоннаабыт  дьүөгэлэрин анал бирииһин Сулҕаччыттан Лириана  Ксенофонтова, Светлана уонна  Анатолий Слепцовтар дьиэ кэргэн анал бириистэрин  Алдантан Александр Карманов, ийэтэ  Мария Михайловна бииргэ төрөөбүт эдьиийэ Саввина Дария Григорьевна анал бирииhин  уонна  Светлана, Егор – Тулуйхан Неустроевтар дьиэ кэргэттэрин анал бирииhин Мэҥэ Хаҥаластан Айыына Харабаева,  култуура колледжыгар бииргэ үөрэммит оҕолорун анал бирииhин Намтан Виктория Исакова ыллылар. Бары кыайыылаахтарга уонна анал аат хаһаайыннарыгар бириистэри күрэҕи тэрийээччилэр, ону сэргэ Мэҥэ Хаҥалас улууһун Мэлдьэхси нэһилиэгин дьаһалтата, култууратын киинэ, Сэргэ Бэстэн Феофановтар, Слепцовтар, аймахтара Лидия Стручкова, Амматтан Ф. Потапов аатынан норуот айымньытын дьиэтэ, Иван Удин бииргэ үөрэммит, устудьуоннаабыт доҕотторо, төрөппүттэрин аймахтара, бииргэ төрөөбүттэрэ туруоран, кыттааччылар бары астынан, үөрэн-көтөн тарҕастылар.

Күрэх олус интэриэһинэйдик ааста, кыттааччылар, көрөөччүлэр, дьүүллүүр сүбэ чилиэннэрэ, Иван Удин төрөппүттэрэ, аймах-билэ дьоно, чугас табаарыстара, бииргэ үөрэммиттэрэ бары астынан тарҕастылар. Күрэх быыһыгар ыалдьыттарга, күрэх  кыттыылаахтарыгар икки күннээх киэн сынньалаҥ бырагыраамата тэрилиннэ. Ол курдук күнүһүн Амма эбэ сылаас уутугар дуоһуйа сөтүөлээтилэр, киэһээ өттүгэр “Саһыл” кэрэ биэрэгэр баҕалаахтарга гитаранан ырыа күрэҕэ, “Бастыҥ балык” балыктааһын күрэҕэ ыытылынна, иккис күн эдэр ырыаһыттарга анаан маастар кылаас, опыт атастаһыыта буолла.

Саамай кэрэхсэбиллээх түгэнинэн бастакы киэһэ ыытыллыбыт Иван Удин кылгас уонна чаҕылхай олоҕун сырдатар ахтыы киэһэтэ буолла. Бу киэһэ эдэркээн, талааннаах ырыаһыт туһунан олус истиҥник оскуолаҕа бииргэ үөрэммит кыргыттара Күннэй Белолюбская, Сахая Протопопова, Сэргэ Бэс кулуубар үлэлээн ааспыт кэмнэрин туһунан оччолорго дириэктэринэн үлэлээбит Анастасия Михайлова, култуура колледжыгар бииргэ үөрэммит кыыһа Айыына Харабаева, Мэлдьэхсигэ үлэлээбит кэмнэрин туһунан култуура киинин дириэктэрэ Мотрена  Сыромятникова уонна  Амматааҕы норуот айымньытын дьиэтиттэн Николай Пухов ахтан -санаан аастылар.

Елена ПОПОВА

Читайте дальше