“Рисуем все” бырайыак бэлиэтин эстафетата А.П. Рязанскай аатынан Соморсун орто оскуолатыгар элбэх киһини уруһуй абылаҥар уһуйда.
СӨ бастакы Бэрэсидьиэнэ М.Е.Николаев көҕүлээһининэн уруһуй нөҥүө үөрэх хаачыстыбатын үрдэтэр сыаллаах 2015 сыллаахха тэриллибит «Рисуем все» бырайыак эстафетатын бэлиэтэ А.П.Рязанскай аатынан Соморсун орто оскуолатыгар тохсунньу 26-30 күннэригэр кэлэн барда. Бу күннэргэ уруһуй учууталлара Александра Сокольникова уонна Артур Макаров салайыыларынан араас хабааннаах тэрээһиннэр тиһигин быспакка ыытылыннылар. Ол курдук, 1-5 кылаас үөрэнээччилэригэр «Мин дьиэ кэргэним» уруһуй күрэҕэ, 6-7 кылаас үөрэнээччилэригэр «Ленинград блокадата» айар үлэлээх кылаас чааһа, улахан кылаас оҕолоругар графическай редакторынан компьютерга уруһуйдуурга үөрэтии, төрөппүттэргэ кыһыҥҥы айылҕаны ойуулуурга маастар- кылаас ыытылынна.
Маастар-кылааска уопсайа 10 төрөппүт кыттыыны ылан, бэйэлэрин уруһуй алыптаах дьарыгар холонон көрөн, түмүгэр астынан бардылар. Маны таһынан Милена Дорофеева Милена (8 кыл.), Алина Максимова Алина, Валерия Николаева Валерия (7 кыл.) «Чэчир» уһуйаан иитиллээччилэригэр ураты көрүҥүнэн уруһуйдааһыҥҥа маастар-кылаас ыыттылар. Уруһуй алыптаах эйгэтигэр ылларбыт киһи сатабыллаах, кэрэни кэрэхсиир уйан дууһалаах буолара саарбаҕа суох. Маннык хабааннаах тэрээһиннэр дьон дьоҕура, талаана аһылларыгар төһүү күүс буолаллар.
Надежда ОХЛОПКОВА