Эмис нэһилиэгэ төһө да кыратын иһин бэрт киэҥ сиринэн тайаан сытар. Киин сиригэр диэри сорох ыалтан бэйэтэ 2-3 килэмиэтиртэн ордук. Онон ыксалга кэлэргэ-барарга бэйэ тырааныспара суох киһиэхэ, дьэ кыһалҕа. Ити эрээри эмистэргэ Роберт Григорьев курдук көхтөөх киһилээх буоланнар ити боппуруос быһаарыллар. Ааспыт сыл түмүктүүр күнүгэр Саҥа дьылынан биир дойдулаахтара бэйэтин өҥөтүн буор босхо оҥордо.
Роберт Григорьев бэйэтэ Өлүөхүмэттэн төрүттээх. Эмискэ күтүөт буолан кэлэн олохсуйбута ыраатта. Олоҕун аргыһа Новикова Елена Захаровналыын үс оҕоҕо күн сирин көрдөрөн, 32 сыл иллээхтик олороллор, билигин сэттэ сиэн амарах эһэтэ, эбэтэ буолаллар. Эмиһи иккис дойдутунан ааҕар. Олохтоохтор да олус көхтөөх, ханнык да уопсастыбаннай үлэттэн туора турбат күтүөттэрин сөбүлээбиттэрэ.
Ол курдук кини нэһилиэк култуурунай олоҕун саамай көхтөөх кыттааччыта. Испэктээх буоллун, кэнсиэр буоллун – хаһан да туора турбат. Олус бэркэ ыллыыр, музыкаҕа талааннаах буолан, эмистэр куттарын дьэ тутар. Баянынан, гитаранан оонньуур, өссө билигин ВИА-ҕа ударниктыыр. Улахан хаһаайыстыбатын сэргэ кини иллэҥ буоллар эрэ, тимир көлөтүгэр олорон дьону Аммаҕа да илдьэр, нэһилиэк иһигэр да таһар. Өссө бырааһынньыктарынан көрөн массыынатын киэргэтэн дьон сүргэтин көтөҕөр. Роберт Григорьевич нэһилиэк биир кырдьаҕас таксиһа буолар. Дэлэҕэ да биир дойдулаахтара “Такси Король” диэхтэрэ дуо. Уопуттаах буолан эдэр, саҥа саҕалыыр таксист уолаттарга, массыыналаахтарга да сүбэ ама суох буолуо дуо.
“Бэйэм суоппардаабытым ыраатта. Онон кыра массыыналаныахпыттан, иллэҥ кэммэр дьону илдьэбин-аҕалабын. Өссө атынан эмиэ таһа сылдьыбытым. Тымныы күннэргэ уһуйааҥҥа ыраах олорооччулар, массыыната суохтар кыһалҕаланаллар бөҕө буоллаҕа дии. Киһи эрэ барыта көлөлөөх буолбатах. Бырааһынньыктарга кулуупка да кэлэр-барар, маҕаһыыннарга бородуукталыыр техниката суох дьоҥҥо уустук. Онон дьоҥҥо көмөлөһөр санаалаах маннык дьарыктанабын. Саҥа дьылга сүпсүлгэн өссө элбиир буоллаҕа. Халлааммыт да оруобуна тымныйан биэрдэ. Онон дьоммун үөрдэ-көтүтэ Саҥа дьыл үүнэр күнүгэр босхо таһарга быһаарыммытым. Маннык аахсыйалары кэмиттэн кэмигэр оҥорооччубун. Маныаха Иванов Никита Дмитриевич, Бубякин Афанасий Афанасьевич, Новиков Геннадий Валентинович өйөөннөр уматык биэрбиттэригэр махталбын тириэрдэбин. Бу курдук бары биир дойдулаахтар өйөһөн сырыттахпытына, тугу барытын кыайыахпытын сөп”, — диэн этэр Роберт Григорьевич.
Бу курдук хас биирдии нэһилиэккэ, хорсун да быһыыны оҥорботоллор бэйэлэрэ олоххо, дьоҥҥо сыһыаннарынан бэйэбит кэммит геройдара баалларыттан киһи үөрэр уонна махтанар эрэ. Маннык үтүө дьон үксүү турдуннар, оччоҕо дойдубут сырдыа, кэрэ буолуо. Бүгүн саҥа сылбыт бастакы күнүгэр Роберт Григорьев эмиэ сүрүн үлэтин иннинэ сүүрэ таҕыста.
“Бүгүн эмиэ иһит- хомуос таһыыта баар буолара буолуо. Ол иһин эмиэ эбиэккэ диэри босхо өҥө оҥоруом. Онтон 1 чаастан үлэбэр дьуһуурустубаҕа барабын. Эдэр таксистар тахсыахтара диэн эрэнэбин”, — диэн этэр.
Тимир көлө сүүрэргэ, үтүөнү оҥорорго бэлэм
“Амма олоҕо” хаһыат