Абаҕа оскуолата төрөппүтү кытта ыкса ситимнээх үлэни тэрийэр

Абаҕа орто оскуолатыгар быйылгы үөрэх дьылыгар төрөппүт бастакы мунньаҕа уратылаахтык ааста. Ыалдьыттар —  Эмис орто оскуолатын дириэктэрэ Гаврил Захаров, коуч Нелли Протодьяконова, оскуола гигиениһэ Дора Кайдалова бэсиэдэлэрин төрөппүттэр улаханнык сэҥээрдилэр.

Эмис орто оскуолатын дириэктэрэ Захаров Гаврил Дмитриевич бастакынан тылы ылан оскуола иитэр үлэтин билиһиннэрдэ. 90-с сыллардаахха «Үрүҥ Уолан» предмети үөрэппит Николай Уваров оскуола оҕолоругар атынан айаны тэрийбитэ. Ол саҕана Эмис нэһилиэгэр 96 мииниллэр ат баар этэ. Атынан айан көннөрү буолбакка, хайаатар да ис хоһоонноох, үөрэтэр сыаллаах буолар. Сир-дойду ааттарын, дьонун-сэргэтин билии соруга эмиэ турар. Мэҥэ Хаҥалас Чыамайыкытыгар, Тиэлигитигэр, Амма улууһугар Болугур, Сатаҕай, Алтан, Бөтүҥ, Абаҕа нэһилиэктэригэр тиийэ айаннаабыттара. Абаҕаҕа Саһыл Сыһыы сэриитин 100 сылын бэлиэтиир тэрээһиҥҥэ эмиэ көхтөөх кыттыыны ылбыттара. Эмис нэһилиэгин дьоно-сэргэтэ барыта өйөөн аттаах айан бырайыак өр сыл үлэлээн кэллэ диэн Гаврил Дмитриевич сиһилии кэпсээтэ. Оттон кыргыттарга эмиэ «Кыыс оҕо – саха омук анала» диэн өйдөбүлүнэн салайтаран араас хабааннаах үлэ ыытылларын билиһиннэрдэ.

Иккис ыалдьыппыт — куораттан Амма Болугурун сиригэр көспүт лайф-коуч Нелли Протодьяконова оҕону иитиигэ бэйэтин көрүүлэрин, билиитин билиһиннэрдэ. “Кырдьык даҕаны” диэн сонньуйуоххар диэри уруһуйдаан харчы энергията ханнык ыалга олохсуйуон сөбүн быһааран көрдөрдө. Ону улахан да киһиэхэ, оҕоҕо да өйдөнөр гына кэпсээтэ. Генетик Нелли Трифоновна оҕо тарбаҕын ойуутунан  туох идэҕэ сөп түбэһэрин ааҕан телефонунан консультация биэриэн сөп эбит.

Ол кэнниттэн гигиенист Дора Кимовна оскуола оҕотун аһылыгын туһунан сэргэх бэсиэдэни ыытта. Төрөппүттэр уонна учууталлар күһүҥҥү сүбэ мунньахтан астынан тарҕастылар.

Надежда Яковлева, оскуола бибилэтиэкэрэ.

Читайте дальше