Эмис нэһилиэгин олохтоохторо дьиэлэригэр тиэрэ түһэн сыппакка, эти-хааны эрчимирдэ күрэхтэһиилэргэ кытыннылар. Биэс араас көлүөнэ түмүллэн араас саастаах дьон оскуола спорт саалатыгар үс көрүҥҥэ күрэхтэрэ сэргэхтик ааста.
В.М. Новиков — Күннүк Уурастыырап аатынан Эмис орто оскуолатын физкультураҕа учууталбыт Мария Неустроева спорт араас көрүҥнэригэр көлүөнэнэн табаарыстыы көрсүһүүлэри тэрийэн ыытара үтүө үгэскэ кубулуйбута ыраатта. Ол курдук Мария Васильевна тохсунньу 10 күнүгэр, оскуолабыт спортивнай саалатыгар 60-с, 70-с, 80-с, 90-с, 2000 сылларга төрөөбүттэр хамаанда хомунан салгын саанан, ох саанан ытыыга уонна Сахаваболга «Көлүөнэлэр күөн күрэстэрэ» диэн олус тыҥааһыннаах, көрдөөх күрэҕи тэрийэн ыытта.
Барыта биэс хамаанда илин-кэлин түсүһэн, түмүккэ 70-с сылларга төрөөбүттэр кыайыы өрөгөйүн биллилэр, иккис- 90-с сыллар, үһүс миэстэ — 80-с сыллар буоллулар. Бары кыттыыны ылбыттар олус сэргэхсийэн, үөрэн-көтөн тарҕастылар. Бэйэм хамаандам, 2000 сыллар, төрдүс миэстэ буоллубут. Ол эрээри маннык күрэхтэн оҕолор улахан уопут ыллыбыт. Сэмэй да буоллар күрэхтэр көрүҥнэригэр Соловьева Нарыйаана, Платонов Алеша оҕунан ытыыга 3-с миэстэ, Гаврильева Алена салгын саатынан ытыыга 3-с миэстэ уонна Сахавабол көрүҥэр күрэхтэһэн Захарова Катя, Чемезов Илья, Афанасьева Мариита 3-с миэстэ буоллубут. Спорду кытта олохпутун дьүөрэлээн, эт-хаан өттүнэн доруобай, чөл туруктаах буолуоҕуҥ диэн ыҥырабын.
Алена ГАВРИЛЬЕВА, Эмис орто оскуолатын 8 -с кылааһын үөрэнээччитэ