Эмис нэһилиэгин олохтоохторо быйылгы Ороһуоспаны ырыа алыптаах киэһэтинэн атаардылар. Биир дойдулаахтара, социальнай ситиминэн индийскэй ырыаны толорон дьон-сэргэ сэҥээриитин ылбыт Егор Петров-Басан кэлэн ыалдьыттаата.
“Егор Петров – Басан биһиги Эмис нэһилиэгин ыччата буолар. Ыраах айан суоппара буолар. Ол курдук Приморскай кыраайы Нахот куоратыгар таһаҕас тиэйэр, Саха сирин ыраах улуустарынан айанныыр. Тапталлаах кэргэн, истиҥ аҕа. Гоша Эмис нэһилиэгэр, Умсаннаах түөлбэтигэр олорон, оҕо сааһа ааспыта.
Оскуолаҕа үөрэнэр сылларыгар кыра кылааска ырыа алыбыгар учуутала. Өрөспүүбүлүкэ култууратын туйгуна, элбэх ырыалардаах Татьяна Васильевна Бандерова үөрэппитэ. Ону тэҥэ кини өссө эмиэ култуура туйгуна Матрена Иннокентьевна Владимирова салайар “Эрэкэ Дьэрэкэ” диэн фольклор бөлөҕөр дьарыктаммыта. Онон ырыаҕа-тойукка Эмискэ уһуйуллан, билигин ол таптыыр дьарыгын бырахпакка ыраах айаныгар аргыс оҥосто сылдьарыттан биһиги үөрэбит. Мин Гошаҕа өссө сэтинньи ый саҥатыгар төлөпүөннээн, дойдутугар кэлэн кэнсиэртииригэр ыҥырбытым. Ону үлэлии сылдьар буолан Саҥа дьыл диэки диэн бириэмэбитин болдьоспуппут. Дьэ ол былаан туолан, Ороһуоспа күн истиҥ иһирэх киэһэ буолан ааста. Тобус толору саала дьон кэллилэр. Эмис олохтоохторо эрэ буолбакка, ыаллыы сытар нэһилиэктэртэн кэлэн эмиэ сынньанан бардылар. Гоша бэйэтэ эмиэ астынан барда. “Олус долгуйдум уонна олуһун дьоммор-сэргэбэр махтанабын” диэн этэр. Ырыаларын аранжировкаларын манна Эмискэ култуура киинигэр таһаарыылаахтык үлэлээбит Василий Татаринов — Хоту Уолан таҥан оҥорбут”, — диэн Е.А. Захарова аатынан култуура киинин дириэктэрэ Анжелика Иванова кэпсээтэ.
Егор Петров-Басан улахан уйуктаах тимир көлөтүн ыытан иһэн Индия аатырбыт артыыһа Митхун Чакраборти “Танцор диско” диэн киинэтиттэн ырыалары олус бэркэ таба толороро социальнай ситиминэн тарҕаммыта. Биир дойдулаахтара уолларын билэн олус үөрбүттэрэ, астыммыттара. Онон аны дьэ Ороһуоспа киэһэ уолларын тутан олорон көрөн, астына ырыатын истэн, ырыа алыбыгар доҕуһуоллатан үҥкүүлээн дуоһуйдулар.
“Гоша маладьыас, дойдун дьонун кэлэн үөрдэн-көтүтэн, ыллаан-туойан барбыккар махтал. Куруутун да маннык ырыа аргыстаах сырыт, уһун суолун тыргылла турдун. Төрөөбүт дойдугар кэлэн бар дьоҥҥор кэрэ киэһэни бэлэхтээбиккинэн, сүрэхтэммиккинэн эҕэрдэлиибит. Ырыа олоҕун аргыһа буоларын көрөн-истэн үөрдүбүт. Баҕа санааларын туолан, олоххун олохтоохтук оҥостон, үлэлээн-хамсаан туруоруммут соруктаргын толороҥҥун быр-бааччы дьоллоохтук олор”, — диэн биир дойдулаахтара баҕа санааларын эттилэр.
Дьоро киэһэҕэ ырыа алыптаах киэһэтин бэлэхтээбит, сынньалаҥы тэрийбит Егор Петровка нэһилиэк баһылыга Прокопий Бубякин, култуура киинин кэлэктиибэ уонна чугас дьоно эҕэрдэлэрин тириэртилэр, бэлэхтэрин туттардылар.
“Амма олоҕо” хаһыат