Эмис нэһилиэгин эдэр ыала, тыа хаһаайыстыбатынан саҥа дьарыктанан эрэ Ирина уонна Дмитрий Пестеревтэр Саҥа дьылы көрсө бэрт сонун бэйэлэрин биир дойдулаахтарын кырачааннарыгар бэлэхтэри оҥордулар.
Тыа сирин сэмэй ыала Ирина уонна Дмитрий Пестеревтар Дьокуускай куораттан кэлэн Эмис нэһилиэгэр олохсуйбуттара үһүс сылыгар барда. Эдэр дьон кэлээт, тыа сиригэр хаһаайыстыбанан дьарыктаннахха үчүгэй уонна туһалаах диэн, сааһырбыт дьон сүөһүлэрин ылан көрөн-иитэн барбыттара. Үлэһит уол Дмитрий дойдутун дьонун өйөбүлүн ылан. Быйыл саҥа хотон туттан, көрөр сүөһүтүн элбэтэн күүстээхтик үлэлии сылдьар. Бу быһаарыныынан кини нэһилиэккэ сүөһү ахсаана аччаабатыгар төһүү күүс буолара саарбаҕа суох. Эдэр ыал оҕолорун тыа сирин үлэтигэр сыһыараллар. Оҕолор дьоннорун кытта тэбис тэҥҥэ наада буоллаҕына хотоҥҥо сылдьаллар, сайынын куурусса, кус-хаас аһатыыта кинилэр үлэлэрэ. Дмитрий тыа сирин оҕото бу үлэҕэ чугас буолуохтаах диэн санаалаах. Оннук толкуйунан салайтаран кини төрөппүттэригэр күүс-көмө буолар оҕолорго бэйэтин бэлэҕин туттарда.
“Тыа хаһаайыстыбатын эйгэтигэр эдэр оҕолору сыһыарар, кинилэр интэриэстэрин тардар сыалтан быйыл кэргэмминээн төрөппүттэригэр хотоҥҥо, хаһаайыстыбаҕа көмөлөһөр оҕолорго Саҥа дьыллааҕы бэлэх оҥорорго быһаарыммыппыт. Манна биһигини Саха өрөспүүбүлүкэтин Ыччат Бырабыыталыстыбатын тыа хаһаайыстыбатыгар, айылҕа харыстабылыгар Департаменын салайааччыта Ньургун Габышев өйөөтө уонна оҕолор төрөппүттэригэр эмиэ Махтал суруктарын тириэртэ. Чахчы да оҕо кыра эрдэҕиттэн дьонноругар күүс-көмө буолан улааттаҕына, инникитин дьоннорун дьыалатын салҕаан, өссө тэнитиэ, улаатыннарыа турдаҕа. Биһиги ыал оҕолорбутун бэйэбитин кытта илдьэ сылдьабыт. Ол курдук дьиэ ис-тас үлэтигэр, хотоҥҥо тэҥҥэ илдьэ сылдьабыт. Оҕолор көмөлөһөллөрүн олус астыналлар. Сайын устата кууруссаларын, кустарын, ньирэйдэрин көрөн истэн көмөлөстүлэр. Билигин кыһыҥҥы кэмҥэ өрөбүллэригэр кустарын, кууруссаларын аһаталлар, уйаларын ыраастыыллар. Дьиэбитигэр 3 боруода куурусса чоппуускалара бааллар. Ону улахан кыыс Ксения көрөр, аһатар, кыра эрдэҕиттэн көтөрдөрү, харамайдары үөрэтэр, көрөр-истэр. Кыра кыыс Лена сайынын ынах ыырга үөрэннэ. Ол да буоллар ынахха тэптэриэ диэн сэрэнэммит улаханнык ыаппатахпыт. Уолбут Мирон 2 саастаах, саамай кырабыт мурун бүөтэ Мэһэй Боотурбут. Кинитэ суох туох да үлэ барбат, мэлдьи илдьэ сылдьабыт, көрөр истэр үөрэнэр элбэххэ. Бу курдук барытыгар “мин-эн” дэсиһэн оҕолорбутун үлэҕэ үөрэтэбит. Этэргэ диэри үлэ киһини киһи оҥорор буоллаҕа дии. Тыа сиригэр олорор оҕолор тыа ыалын олоҕун билиэхтээхтэр, үлэҕэ сыстаҕас буолуохтаахтар. Ол хаһан баҕарар олохторугар күүс-көмө буолуо”, — диэн этэр үтүө толкуйдаах Дмитрий.
Дьэ бу курдук олус сонун бэлэхтэр Эмис нэһилиэгэр олорор хаһаайыстыбалаах, онно көмөлөһөр оҕолорго туттарылыннылар, үөрүүлэрин үксэттилэр. Бука бу иннинэ маннык ааттаах-суоллаах бэлэхтэр оҥоһулла иликтэр буолуохтаахтар.
“Ыалларбытыгар Дималаах,Иринаҕа истиҥ махталбытын тиэрдэбит. Уолбутугар Сэмэҥҥэ «ийэ, аҕа көмөлөһөөччүтэ» диэн ааттаан наһаа үчүгэй бэлэх туттарбыттарыгар ис сүрэхтэн махтанабыт! Кырдьык эдэр ыалларбыт наһаа үлэһиттэр, дьоҥҥо наһаа истиҥ сыһыаннаахтар, мэлдьи көмөлөһө сылдьар буолаллар. Кинилэри кэлэн иһэр Саҥа дьылынан эҕэрдэлээн туран, чэгиэн доруобуйаны, үлэлэригэр, үөрэхтэригэр үрдүк ситиһиилэри баҕарабыт. Дьиэ кэргэннэригэр ил-эйэ эҥэрдэстин уонна тапталлара хаһан да уостубатын”, — диэн элбэх оҕолоох ийэ Анастасия Степанова санаатын тириэрдэр.
“Амма олоҕо” хаһыат