Эмис нэһилиэгин МФОК саалатыгар оскуола уолаттарыгар, ону тэҥэ уһуйаан оҕолоругар хапсаҕай күрэҕэ буолан ааста. Оҕолору СӨ үтүөлээх тренерэ Аркадий Тастыгин иккис сылын дьарыктаан, күрэхтэһиилэри тэрийэн ыытар.
Күрэхтэһии бэрт тыҥааһыннаахтык уонна сэргэхтик ааста. Хапсаҕайга “Чуораанчык” уһуйаантан биэс кырачаан тустууну сэҥээрээччи кытынна. Кинилэртэн кыра сүһүөхтэргэ бастакы миэстэни Сысолятин Саша, иккис миэстэни Неустроев Миша, орто сүһүөххэ бастакы миэстэни Ларионов Герман, иккис миэстэ Стручков Костя уонна үһүс миэстэ Болтунов Дуолан буоллулар. Онтон оскуола уолаттарыгар 7 ыйааһыҥҥа күрэхтэстилэр. Ол курдук 15 киилэҕэ 1-кы миэстэ Петров Даниель, 2-с миэстэ Левин Сайнар, 3-с миэстэ Ян Васильев, 30 киилэҕэ 3-с миэстэ Иванов Дьулусхан, 2-с миэстэ Алик Ноговицын, 1-кы миэстэ Захаров Алёша, 35 киилэҕэ 2-с миэстэ Ильяр Солдатов, 1-кы миэстэ Эрхан Захаров, 40 киилэҕэ 3-с миэстэ Айтал Ларионов, 2-с миэстэ Тимофеев Матвей, 1-кы миэстэ Солдатов Дамир, 55 киилэҕэ 2-с миэстэ Захаров Дима, 1-кы миэстэ Алёша Платонов, 55 киилэттэн үөһээ ыйааһыҥҥа 2-с миэстэ Маркел Васильев, 1-кы миэстэ Левин Саян, 50 киилэҕэ 1-кы миэстэ Васильев Сеня буоллулар.
“Мин икки уол оҕо ийэтэ буолабын. Былырыыҥҥы үөрэх дьылыттан тустууга Александр Александрович Ларионов уонна Аркадий Николаевич Тастыгин курдук тренерданаммыппыт олус үчүгэй. Уолаттар эт-хаан, өй-санаа, дисциплина өттүнэн, күүскэ сайыннылар. Мин соҕотох ийэ буоларбынан, элбэҕи билбэтим да сатаабатым да элбэх уонна аҥардас физкультура эрэ уруогунан муҥурданаллара син биир тиийбэт курдуга. Улахан уол бу саас Владивосток куоракка баран сынньаммыта, ыраах айаҥҥа баран киэҥ сири көрөн, сайдан үөрэн-көтөн кэлбитэ. Кыра уолбун кыра диэн бу саас күрэххэ ыыппатаҕым. Быйыл сэтинньи ыйга Белогорскайга барыахтаахтар. Дьиҥэ бу диэн эттэххэ уол оҕо айылҕаҕа, спортка хайаан да сыстыахтаах дии саныыбын. Тустууга улахан ситиһии кэлэ илик ол да буоллар, бэйэтин кыаҕынан 2-3 миэстэлэр бааллар. Чыпчаалга спорт эйгэтигэр, улахан ситиһиилээх уолаттар кэлэн маастар кылаас биэрэннэр уолаттар биллэ тупса түстүлэр Араас элбэх күрэхтэргэ айанныыллар, ол да буоллар халтайга буолбатах син биир кыайыы мэтээллээх кэлэллэрэ төрөппүккэ, оҕоҕо, тренерга олус үөрүүлээх. Онон биһиэхэ инник тренердар кэлбиттэриттэн үөрэбит уонна кинилэргэ инникитин элбэх ситиһиилэри, кыайыыны хотууну баҕарабыт”, — диэн тустуунан дьарыктанар уолаттардаах төрөппүт Тамара Левина санаатын үллэстэр.
Күрэхтэһии кэнниттэн оҕолору дьарыктыыр тренер Андрей Николаевич Тастыгины көрсөн кэпсэттим.
«Мин Аркадий Николаевич Эмис нэһилиэгэр үлэлээбитим иккис сылым буолан эрэр. Ол курдук оскуолаттан 12 оҕону, уһуйаантан 11 оҕону дьарыктыыбын. Оҕолор былырыыҥҥытааҕар лаппа эбиллибиттэр. Быйыл үөрэх сылыгар сезон арыллыытыгар икки уол, Петров Даня уонна Левин Сайнар бастаабыттара, “Боотурдар оонньууларыгар” Петров Даня, Васильев Сеня эмиэ бастакы миэстэни ылбыттара. Сыллааҕы үлэҕэ кэтээн көрдөхпүнэ оҕолор кыахтара, тусталлара, кыайыыга дьулуурдара эбиллибит. Былырыын уопсайа 6 күрэххэ кыттыбыппыт. Кэлэр ыйга Белогорскайга бараары 9 оҕо бэлэмнэнэ сылдьар. Мин санаабар тустууга эмистэр иккис тыыннара киирдэ диэхпин баҕарабын. Биир уолбут Николаев Айгылаан Аммаҕа, онтон Степанов Стёпа Чурапчы спорт оскуолаларыгар киирдилэр», — диэн тренер иитиллээччилэрин туһунан билиһиннэрдэ.
Эрчим НИКОЛАЕВ, Эмис орто оскуолатын 9-с кылааһын үөрэнээччитэ.