В.М. Новиков – Күннүк Уурастыырап аатынан Эмис орто оскуолатын 5-с кылааһын үөрэнээччилэрэ Арассыыйа Ийэлэрин күнүн көрсө олохтоохторго бэртээхэй тэрээһини тэрийдилэр. Нэһилиэк Герой Ийэлэригэр анаммыт тэрээһини кылаас салайааччыта Василиса Неустроева көҕүлээтэ.
Арассыыйа Ийэлэрин күнүн көрсө Е.А. Захарова — Саха Күөрэгэйэ аатынан култуура киинигэр Арассыыйаҕа Дьиэ кэргэн, Саха сиригэр Оҕо саас сылынан “Ыллыыр ыллык” диэн ырыа күрэҕэ буолан ааста. Күрэх “ Эбэм лэппиэскэтэ” диэн 9-с кылаас үөрэнээччитэ Эрчим Николаев бэйэтин айбыт хоһоонун ааҕыытынан уонна 5- кылаас кыргыттара иһирэх ырыаны толорууларынан саҕаланна.
Бу күн Герой ийэлэрбитин сырдатар слайданы көрдөрдүлэр. Күрэххэ кыыс ийэтинээн, эбэтэр эбэтинээн кытыннылар. Кинилэр толорууларын нэһилиэк баһылыга Прокопий Бубякин, Герой ийэ Туяра Устинова уонна култуура киинин уус уран салайааччыта Игорь Болтунов сыаналаатылар.
Күрэх түмүгүнэн кыайыылаахтар уонна Гран при хаһаайыннара быһаарылыннылар, анал ааттар иҥэрилиннилэр. Ол курдук Аюна Ноговицына, ийэтинээн Ирина Ивановналыын 1-кы степеннээх лауреат аатын ылан Герой ийэ Татьяна Никифоровна Новикова дьиэ кэргэниттэн сертификатынан, бирииһинэн, 2-с степеннээх лауреат аатын Анжелина Ноговицына эбэтинээн Анжелика Александровна Ивановалыын ылан элбэх оҕолоох ийэ Васильева Екатерина Романовна, ону тэҥэ Герой Устинова Елена Степановна оҕолоро, сиэннэрэ туруорбут харчынан бириэмийэлэрин ыллылар. Маны сэргэ Алгыстаан Николаев, ийэтинээн Сардана Валентиновналыын эмиэ 1-кы степеннээх лауреат буолан Бубякина Екатерина Петровна, Новикова Прасковья Николаевна, Алиса Соловьева, эбэтинээн Софья Егоровналыын 2-с степеннээх лауреат буолан Петрова Тамара Петровна оҕолоро, сиэннэрэ олохтообут харчынан бириистэринэн бэлиэтэннилэр. Ону таһынан кинилэр өссө Герой ийэ Новикова Анна Ивановна аатынан бириэмийэни ылан «Элбэх оҕолоох дьиэ кэргэн» номинация хаһаайыннара буоллулар. Алиса элбэх оҕолоох Сутакова Мария Еремеевна аатынан бириэмийэни тутан «Кэскиллээх ырыаһыт» анал ааты ылла. Ити курдук кыттыбыт бары пааралар анал бириистэри туттулар.
“Бу киэһэ нэһилиэкпит Герой ийэлэрин тустарынан слайда олус үчүгэйдик оҥоһуллубутун сэргии көрдүм. Кылаас салайааччыта Василиса Валерьевна сыралаах оскуолаҕа да, нэһилиэккэ да куруутун ситиһиилээх буолар. Бэртээхэй үчүгэй тэрээһин. Биһиэхэ олус үөрүүлээх. Герой ийэлэрбитиэн куруутун киэн туттабыт, холобур оҥостобут. Эдэр ийэлэргэ элбэх оҕолонон нэһилиэкпит ахсаанын элбэтэллэригэр диэн баҕа санаабын тириэрдэбин”,- диэн элбэх оҕолоох Ефросинья Новикова санаатын үллэстэр.
Оскуола дириэктэрин солбуйааччы Дария Захарова, ыытыллыбыт тэрээһин ситиһиилээхтик барбытын бэлиэтээн туран, олохтоох дьаһалта нэһилиэккэ Герой ийэлэр бюстарын оҥорторон туруоралларыгар, ол нэһилиэккэ дириҥ суолталаах буолуо, историяҕа хаалан, кэлэр күлүөнэ ыччаттар билиэхтэрэ, үөрэтиэхтэрэ кэлэр күлүөнэ ыччаттар билиэхтэрэ үөрэтиэхтэрэ, Герой ийэлэр оҕолоро, сиэннэрэ күүс-көмө буолуохтара этэ диэн санаатын тириэртэ.
Онтон “Ыллыыр ыллык” ырыа күрэҕин Гран при хаһаайыннарынан Ньургуйаана Устинова ийэтинээн Сахаяна Павловналыын буоллулар уонна “Амма кытыла” сынньанар базаҕа путевканан наҕараадаланнылар.
“Биһиги 5-с кылаас коллектива, учууталбыт Василиса Валерьевна салайыытынан «Ыллыыр ыллык» ырыа күрэҕин тэрийдибит. Бу күрэххэ оҕо ийэтинээн, эбэтинээн ыллыыра ирдэммитэ. Бу күрэххэ уопсайа биэс паара буолан кытынныбыт. Мин кылааһым аатыттан ийэбинээн Сахая Павловналыын биллэр “Дарите женщинам цветы” диэн ырыаны ыллаатыбыт. Ийэбинээн ыллыырбытын олус сөбүлүүбүт. Бу күрэххэ хайдах эрэ кыайыахпыт диэн эрэнэ саныыр этим. Тоҕо диэтэххэ ийэм бэйэбитигэр барсар, судургутук ылланар уонна дьон сөбүлүү истэр ырыатын ыллыахха диэбитэ. Ийэбэр итэҕэйэр буоламмы, н тута сөбүлэспитим. Кини эппитэ куруутун сөп буолааччы. Түгэнинэн туһанан күндү ийэбин Сахая Павловнаны уонна эбэлэрбин Марианна Егоровнаны, Лолита Николаевнаны кэлэн иһэр Арассыыйа Ийэлэрин күннэринэн эҕэрдэлиибин”- диэн Ньургуйаана күрэх кэнниттэн үллэстэр.
Онтон иккис миэстэни ылбыт сцена бэтэрээнэ, ырыа куттаах Софья Соловьева тэрээһинтэн астыммытын бэлиэтиир.
“Мин сиэмминээн Алисалыын “Мааны мастар” диэн ырыаны ыллаан көрдүбүт. Бастакы сырыыга үчүгэй диэн бэйэм үөрэ санаатым. Бу тэрээһини ыыппыт 5-с кылаастарга уонна салайааччыларыгар Василиса Валерьевнаҕа махтанабыт. Герой ийэлэри ахтан-санаан ааспыттара олус үөрүүлээх. Ийэбин көрөммүн долгуйан, уйадыйан ыллым”, — диэн этэр Софья Егоровна.
Күрэх түмүгэр тэрийээччилэр бириистэри туруорбут, күрэҕи өйөөбүт дьоҥҥо Махтал суруктары туттарда уонна ырыаһыт ийэлэр ырыалара киирбит, куйаар куодунан көстөр видеолаах, ырыанньыгы ыалдьыттарга бэлэх ууннулар.
Эрчим НИКОЛАЕВ