Эмистэр ыһыах ыалдьыттарын бастакынан көрсүөхтэрэ

Эмис нэһилиэгэ Амма улууһун аартыгар олорор нэһилиэк. Олоҥхо ыһыаҕар кэлэр ыалдьыттар Эмистэн саҕалаан олоҥхо умсугутуулаах эйгэтигэр киирэн барыахтара. Нэһилиэк олохтоохторо дэлэгээссийэлэри бастакынан көрсөргө ох курдук оҥостон бэлэмнэнии түбүгэр сылдьаллар.

Биһиги улууска аартык нэһилиэк буоларбытынан ааһан эрэр ыалдьыттары элбэх олоҥхоһуттаах нэһилиэк буоларбытынан кэлэр ыалдьыттарбытын сахалыы тэринэн көрсүөхтээхпит. Манна бэлэмнэн 2007 сыллаахха тутуллубут Олоҥхо дьиэбитин сөргүтэн, өрөмүөннээн бүтэрэн эрэбит. Кэлэр ыалдьыттар хайаатар да норуот суруйааччыта Күннүк Уурастыырап төрөөбүт Саппыйа алааһыгар сылдьан ааһалларыгар көрдөһөн дэлэгээссийэлэргэ анал буклет ыыталаабыппыт. Кэлбит дьон бу Олоҥхо дьиэтигэр сылдьан, уһун айантан сынньанан, арчыланан ааһыахтаах. Кинилэри нэһилиэкпит далбар хотуннара көрсүөхтэрэ, арчылыахтара. Саппыйа алааһа дириҥ ис хоһоонноох. Онно кэпсиирбит элбэх. Манна Күннүк Уурастыырап хоһооҥҥо хоһуйбут көлүкэчээнэ, кини олоҕун көрдөрөр балаҕан дьиэ, үрүмэччи маҥан ата баар ”, — диэн Эмис нэһилиэгин баһылыга Прокопий Бубякин сырдатар.

Кэлбит ыалдьыттар бу суол аартыгар турар, улахан айан суолуттан көстөр алааһы быһа ааспакка киирэн таҕыстахтарына элбэҕи билэн, Аммаҕа тиийиилэригэр Амма улууһун туһунан үгүһү билэн ааһыахтара. Ону олохтуурга Эмис нэһилиэгин дьоно барыта түмсэн күннэри-түүннэри үлэлии сылдьар.


Бу Олоҥхо дьиэбит биллэр этнограф Вильям Федорович Яковлев сүбэтинэн тутуллубута. Ол иннинэ эрдэ Күөрэлэ алааска Чээбийгэ ананан бастакы Олоҥхо ыһыаҕа буолан ааспыта. Биллэрин курдук биһиги өрөспүүбүлүкэ 11 Олоҥхотун дьиэтин ситимигэр киирбиппит. Онон сыллата субсидия ылыытыгар Граҥҥа кыттабыт. Былырыын Олоҥхо туруоруутугар гран ылбыт эбит буоллахпытына быйыл мас оҥоһуктарын күрэҕин ыытарга ыллыбыт. Онон бүгүҥҥэттэн саҕалаан бэс ыйын 8 күнүгэр диэри өрөспүүбүлүкэтээҕи мас уустарын күрэҕин ыытыахпыт. Күрэх Олоҥхо дьиэтин тэлгэһэтигэр ыытыллыа. Эрдэттэн биллэр мас уустарын кытта кэпсэтэн, кинилэр үс күн устата олоҥхо скульптураларын оҥоруохтара, бастыҥы быһаарсыахтара”, — диэн Олоҥхо ситимин дьиэтин дириэктэрэ Анжелика Иванова бэлэмнэнии үлэтин туһунан ситэрэн биэрдэ.

“Амма олоҕо” хаһыат.

Читайте дальше