Амма улууһун борокуратууратыгар өрөспүүбүлүкэ борокуруорун кытта быһа сибээс буолла. Борокуруор Максим Попов урбаанньыттары долгутар боппуруостарга эппиэттэри биэрдэ.
ВКС көрсүһүүгэ кыттыыны улуус борокуруора Михаил Николаев, улуус баһылыга Степан Кузьмин, “Биисинэс- инкубатор салайааччыта Николай Афанасьев, урбаанньыттар Георгий Васильев уонна Людмила Куприянова кытыннылар. Өрөспүүбүлүкэ борокуруора Максим Попов бу курдук куйаар ситиминэн урбаанньыттарга тус көрсүһүүлэри оҥордо. Онон урбаан эйгэтин үлэһиттэрэ борокуруорга туһааннаах боппуруостары биэрэн тута эппиэттэри ыллылар. Быһа сибээһинэн ыраах хоту сытар улуустар кытта кытыннылар. Онтон Амматтан кыттыбыт урбаанньыт Георгий Васильев газгольдер курдук аныгы, гааһынан сылытар оборудованиены туруорууга субсидия көрүллүүтүн, баар бырагыраама салгыы үлэлиэ дуо диэн ыйыталаста. Бу бары урбаан эйгэтигэр үлэлиир дьону олус долгутар боппуруос буолар. Маныаха Максим Николаевич урбаанньыттартан сайаапканы хомуйан, ол кэнниттэн ситэриилээх былааска боппуруос көрүллүө диэн эттэ. Людмила Куприянова бэйэ дьарыктаах урбаанынан дьарыктанар дьон кыһалҕатын таарыйан, кууһунан атыылыыр маҕаһыыннар сөптөөх ирдэбилгэ эппиэттиир квитанциялары биэрбэттэрин, бу барыта отчуоту оҥорууну ыарахаттары үөскэтэрин бэлиэтээн эттэ. Онно өрөспүүбүлүкэ борокуруора чахчы турар кыһалҕа баарын, онон борокуратуура өртүттэн нолуок уорганнарыгар сөптөөх сорудах барыа диэтэ.
Өрөспүүбүлүкэ борокуруора Амма улууһун кытта сибээскэ баһылык Степан Кузьмин кыттыытын сэргээтэ уонна бу улуус дьаһалтата бэйэтин урбаанньыттарын өйүүрүн, кинилэргэ болҕомто уурарын көрдөрөр диэн бэлиэтээтэ.
“Амма олоҕо” хаһыат