Амма улууһун баһылыга Степан Кузьмин Дьокуускай куоракка СӨ экэниэмикэ министиэристибэтигэр үлэлээтэ. Манна баһылык улуус инники экэнэмиичэскэй сайдыытын боппуруостарынан кэпсэтистэ.
“Дьокуускай куоракка сылдьан өрөспүүбүлүкэ экэниэмикэҕэ миниистирэ Петр Иванович Попову уонна кини солбуйааччыта Иван Елизарович Елисеевы кытта көрүстүм. Бу көрсүһүүбүтүгэр биһиги улуус социальнай-экэнэмиичэскэй сайдыытын кэпсэттибит, ону сэргэ билигин улууспутугар инвестиционнай бырагырааманан тутулла турар эбийиэктэр хаамыыларын, хайдах олоххо киирэн иһиилэрин ырыттыбыт. Инники өссө сайдыыга туһуламмыт былааннар элбэхтэр. Бу туһунан министиэристибэ салалтатыгар билиһиннэрдим. Түмүккэ экэниэмикэ министиэристибэтэ үтүө үгэс быһыытынан биһиэхэ бурдук тааралааһыҥҥа субуотунньукка тахсарга бэлэмин биллэрдэ”, — диэн улуус баһылыга Степан Николаевич үлэтин билиһиннэрдэ.
Маны сэргэ баһылык СӨ тыатын хаһаайыстыбатын министиэристибэтэ ыыппыт ВКС кэмпириэнсийэтигэр кытынна. Биллэрин курдук кэлэр сылтан тыа хаһаайыстыбатын өйүүр боломуочуйалар улууска бэриллиэхтээхтэр. Онон бэбиэскэҕэ бу боппуруос туран киэҥ ырытыһыы буолла.
“Биһиги улууспут тыа хаһаайыстыбатын улууһа буолар. Онон бу салааны биһиги куруутун өйүүбүт уонна өйөөн кэллибит. Инникитин боломуочуйалар кэллэхтэринэ, кэлэр көмө харчыны сөптөөхтүк тыыран, тыа хаһаайыстыбата улууспутугар сайдарыгар, кэҥииригэр үлэлэһиэхпит. Билигин хомуур үлэтигэр айылҕа мэһэйдэринэн төһө да уустук балаһыанньа буоллар, баар сүөһүбүтүн, сылгыбытын сыл таһаарарга үлэлэһэ сылдьар дьоммутун бары өттүнэн өйүөхпүт”, — диэн этэр Степан Николаевич.
“Амма олоҕо” хаһыат