Дьокуускай куоракка «Якутянки- надежный тыл страны» диэн Саха сирин дьахталларын VIII Спартакиадатыгар Амма улууһун хамаандата уон бастыҥнар ортолоругар киирдэ. Спартакиада үс күн устата ыытыллан уопсайа тоҕус көрүҥҥэ күрэхтэстибит.
Ахсыс төгүлүн ыытыллар өрөспүүбүлүкэ дьахталларын спартакиадатыгар улуустартан 23 хамаанда күөн көрүстэ. Ол иһигэр Амма улууһун сүүмэрдэммит хамаандата баран кыттыыны ылла. Ол курдук 9 көрүҥҥэ күрэхтэстибит: ГТО нуорматын туттарыыта, саахымат, аэробика, ону таһынан зачекка ааҕыллар дуобат, хабылык, остуола тенниһэ, ытыы, волейбол, сүүрүү күрэхтэрэ буоллулар. Саастарынан арахсан күрэхтэстибит: 18-39 диэри, 40-54 уонна 55-тэн үөһэ. Хамаандаҕа улууска пропискалаах 30 спортсмен дьахталлар талыллан кытыннылар.
Маҥнайгы күн мандат аастыбыт, Амма түмсүүнү кытта көрүстүбүт, эрдэттэн хас биирдиибит кээмэйинэн сакаастаммыт футболка, ветровка ыллыбыт, » Здоровая женщина- будущее страны» акциянан скрининговай обследование баран доруобуйа туругун толору биллибит, мунньахха сылдьан күрэхтэр балаһыанньаларын билистибит, «И наполнится любовью женщин души» диэн экскурцияларга баҕалаах дьон сырыттылар. ГТО туттарыытыгар хамаандаттан 3 спортсмен Милена Белолюбская, Ольга Наумова, Дария Федорова кытыннылар. Теннискэ Ирина Иванова, Анна Ларионова, Лидия Пестерева, дуобакка Уйгулана Варламова, Мария Григорьева, Лариса Никифорова үһүс миэстэҕэ биир очконан тиийбэтилэр. Буулдьанан ытыыга Ариадна Степанова, Марина Степанова, Галина Кутукова, хабылыкка Татьяна Николаева, Алена Чирикова, Галина Карамзина, саахымакка Розалия Павлова, Сардана Стручкова, Мария Фомина, волейболга Туйаара Емельянова тренердээх 9 спортсмен Амма улууһун чиэһин көмүскээтилэр.
Милена Белолюбская, Ольга Наумова, Дария Федорова, Татьяна Олешко эстафета кыайыылаахтарынан тахсан хамаандаҕа кыһыл көмүс мэтээли аҕаллылар. Биирдиилээн күрэххэ биир да кыайтарыыта суох, икки тэҥнэһиилээх Уйгулана Варламова 2-с миэстэ буолан үөрдэ-көттө.
Икки күннээх күрэх түмүгүнэн ГТО туттарыытыгар — 9-с миэстэ, саахымакка -11, дуобакка-4, хабылыкка- 7, буулдьанан ытыыга — 5, волейболга -6, сүүрүүгэ-8, теннискэ — 4 миэстэ буоллубут. Уопсай түмүккэ 1 миэстэҕэ -Дьокуускай, 2 миэстэҕэ Мэҥэ Хаҥалас, 3 миэстэҕэ Таатта улууһун хамаандалара таҕыстылар. Күүрээннээх күрэх түмүгэр Амма улууһа уон иһигэр киирэн 9-с миэстэни ыллыбыт. Спортивнай таҥаһынан, транспорынан, командировочнайынан хааччыйан бэртээхэй тэрээһиҥҥэ кытыннарбыт улууспут баһылыгар Степан Кузьмиҥҥа, спорт управлениетын салайааччытыгар Дмитрий Наумовка, спортивнай тыыҥҥа киллэрэн, хомуйан- салайан илдьэ сылдьыбыт салайааччыбытыгар Мира Федороваҕа, Туйаара Васильеваҕа, Болугур оскуолатын суоппарыгар Илья Михайлович Ивановка улахан махталбытын тиэрдэбит.
Лариса НИКИФОРОВА-Баһылай кыыһа