Ааспыт сыл өрөспүүбүлүкэбитигэр Үлэ сылынан биллэриллэн үтүмэн элбэх тэрээһиннэри сэргэ, дьиҥ чахчы үлэ дьонун чиэстээһин ыытыллыбыта. Маныаха Ил Дархан Айсен Николаев “Үлэ киһитэ” диэн анал бириэмийэни олохтоон элбэх дьонтон 50 киһи талыллан бириэмийэ лауреаттарынан буолбуттара. Бу 50 киһи ортотугар Амма улууһуттан гинеколог быраас Евдокия Долгунова баара.
Евдокия Степановна Долгунова Нам улууһуттан силистээх-мутуктаах эрээри, 1993 сыллаахха Амма улууһугар үлэлии кэлиэҕиттэн Амманы дойду оҥостон улуус кырачаан олохтоохторо күн сирин көрөллөрүгэр түбүгүрэ сылдьар. Таһаарыылаах үлэтинэн Евдокия Долгунова РФ уонна СӨ Доруобуйатын харыстабылын туйгуна, үрдүк квалификационнай категориялаах быраас буолбута. Онтон ааспыт сылга Үлэ киһитэ бириэмийэ лауреата аатын ылбытыгар Амма дьоно, бииргэ үлэлиир кэллиэгэлэрэ долгуйа үөрбүттэрэ. Онон Амма улууһа лауреаттар ортолоругар эмиэ ааттаммыта.
“Сыл хайыы-үйэ ааһа охсубут дии. Үлэлиир буоллахха, чахчы бириэмэ биллибэккэ ааһар. Өрөспүүбүлүкэбит Ил Дархана бу бириэмийэни биир бириэмэлээх гынан Үлэ сылыгар эрэ буолбакка, салгыы ылыммыта олус үчүгэй. Үлэ дьоно сыаналанара дэлэ үчүгэй дуо. Мин ааспыт сылга үөрүүлээх тэрээһиҥҥэ сылдьан элбэх киһини кытта билсибитим, дойдубут чахчы да дьонунан баай эбит диэн өссө төгүл итэҕэйбитим. Билигин бириэмэ да ааспытын иһин, ол түгэни долгуйа саныыбын уонна киэн туттабын. Өссө төгүл миигин бу бириэмийэҕэ түһэрбит кэлэктииппэр, дьоммор-сэргэбэр дириҥник махтанабын. Үрдүк наҕараада биһигини үрдүккэ кынаттыыр уонна дьоммут иннигэр эппиэтинэһи үрдэтэр. Быйылгы бириэмийэҕэ эмиэ Амма дьоно баар буолуо диэн эрэнэбин”, — диэн Евдокия Степановна санаатын үллэһиннэ.
Быйыл “Үлэ киһитэ” бириэмийэни туттарыы муус устар 30 күнүгэр ыытыллыа.
“Амма олоҕо” хаһыат