Амма нэһилиэгэр баар “Фаворит” билъярдыыр кулууп быйылгы сезонугар үһүс, сылы түмүктүүр турнирын ыытта. Турнир анал байыаннай дьайыыга кытта сылдьар биир дойдулаахтарбытыгар ананан “Аһымал” турнир диэн ааттанан ыытылынна. Ол курдук киирбит усунуос барыта анал фондаҕа туттарылынна. «Фаворит» кулууп өрөспүүбүлүкэҕэ бастыҥ аатын ылла.
“Бу турниртан киирбит усунуос харчытын барытын дойдуларын көмүскүү сылдьар биир дойдулаахтарбытыгар көмөнү оҥорор фондаҕа ыытар туһунан сөбүлэспиппит. Онон манна аҥардас кытта эрэ кэлбит дьон буолбакка, биһиги кулууппут бары кыттыылаахтара, билъярд спордун сэҥээрээччилэр бары кыттыстылар. Турнир арыллыытыгар улуус фондатын салайааччыта Прокопий Евгеньевич Прокопьев кэлэн кыттыыны ылбыта. Биһиги кулууппут чилиэннэриттэн эмиэ чугас дьонноро бу анал байыаннай дьайыыга кытта, дойдуларын көмүскүү сылдьаллар. Ол курдук ким уола, ким быраата, ким чугас аймаҕа . Маннык сыаллаах-соруктаах турниры бука билъярдистар аан бастакытын улууска ыыттыбыт буолуо. Онон инникитин атын да федерациялар ыытыллар күрэхтэһиилэргэ усунуос курдук оҥорон фондаҕа көмө киллэрэллэригэр ыҥырабын”, — диэн кулууп салайааччыта, турнир тэрийээччитэ Григорий Аммосов санаатын тириэрдэр.
Турнир икки бөлөҕүнэн арахсан барда. Ол курдук 50 саастарыгар диэри уонна 50-тан үөһээ саастаахтар. Сытыы, уннуьуктаах уһун киирсиилэр кэннилэриттэн бастакы уонна иккис бөлөхтөн түөрт бастыҥнар хаалан, уопсайа ахсыа буолан бастыҥы быһаарыстылар. Ким кимниин киирсэрэ сэрэбиэй быһыытынан барда. Манна биирдэ хоттордун да туоруугун. Ол түмүгэр бастакы миэстэ Амматтан Алексей Пахомов, иккис миэстэ Амма Наахараттан Иван Пахомов, үһүс миэстэ Сатаҕайтан Афанасий Неустроев уонна Амматтан Сандал Кожуров ыллылар.
“Турнирбыт түүн 2 чааска түмүктэннэ. Онон кыттыбыт бары уолаттарга махтал буоллун. Ону сэргэ кэлэн кыттыбатах уонна бэйэлэрин көмөлөрүн ыыппыт дьоммутугар эмиэ махталбытын тириэрдэбит. Этэн аһарбытым курдук усунуос харчыта барыта фонда анал счетугар ыытыллар. Аны турнирбыт буола турдаҕына олус үчүгэй үтүө сонунун тутан үөрдүбүт. Ол курдук өрөспүүбүлүкэ спордун министиэристибэтэ, федерациябыт билъярд кулууптарыгар икки кыайыылаахтары быһаарбыт.
Өрөспүүбүлүкэ билъярд спордун федерациятын салайааччыта Андрей Васильевич Никифоров буолар. Ол курдук хоту улуустартан Муома улууһун Саһыр диэн нэһилиэгэр баар уонна бу киин улуустарга биһиги “Фаворит” кулууппут “Бастыҥ билъярд кулууба” диэн ааттаннылар. Онно улахан кубогы кулууппут бэрэстэбиитэлэ Владимир Терентьев спорт миниистирэ Леонид Спиридоновтан тутта. Онон бу сылбыт ситиһиилээх буолла”, — диэн Григорий Григорьев үөрүүтүн үллэһиннэ.
Манан бу сылга “Фаворит” кулууп үлэтин түмүктээн, кэлэр сылга өссө күүстээх санаалаах үктэннэ.
“Амма олоҕо” хаһыат