Амма нэһилиэгэр баар “Фаворит” бильярднай кулууп 2024-2025 сыллаах сезонун аста. Сезону аһар күрэхтэһии икки бөлөҕүнэн арахсан ыытылынна. Сарсыарда эрдэттэн саҕаланан, киэһэ хойукка диэри бильярд спордун сэҥээрээччилэрэ быйылгы сезон бастыҥнарын быһаардылар.
“Бу күрэхтэһиибитигэр 50 саастарыгар диэри 10 уонна 50-тан үөһээ саастаах бэтэрээннэргэ 18 киһи кытынна. Ол иһигэр Эмис нэһилиэгиттэн бильярдыы сэҥэрээрэр үс кэрэ аҥар, Галина Куприянова, Нонна Ноговицына уонна Саргылана Васильева кэлэн тэбис тэҥҥэ кииристилэр. Оонньуу “комбинированная пирамида” көрүҥүнэн барда. Кэрэ аҥардар бэтэрээннэр бөлөхтөрүгэр оонньоотулар. Манна кинилэр эр киһини кытта түбэстэхтэринэ 7 шары киллэрдэхтэринэ кыайыылаах буолуохтаахтар. Эр киһи 8 шары киллэриэхтээх. Күрэхтэһии уопсайынан сүрдээх интэриэһинэйдик, киирсиилээхтик барда.
Кылаабынай судьуйанан уопуттаах Игнат Гаврильев үлэлээн сиэрдээхтик сыаналаабытын бэлиэтиибит. Киниэхэ кулууппут администратора Михаил Неустроев көмө буолла. Бу күрэхтэһиигэ саамай саастаах оонньооччубут спорт бэтэрээнэ Василий Кузьмин буолла. Василий Петрович 76 сааһыгар сылдьар. Манна кулуупка кэлэн куруутун кэлэн оонньоон сүһүөхтэрбин эрчийэбин диир. Ити курдук өссө 70-нарын ааспыт Болугуртан Алексей Устинов, Василий Ефремов кэлэн эмиэ бэрт үчүгэйдик кытыннылар, сэргэхсийэн, кэпсэтэн-ипсэтэн бардылар. Бильярд спорда киһи илиитэ-атаҕа хамсыырыгар, уунаҥнаан киһи сүһүөхтэрэ ыалдьыбаттарыгар, доруобай буолалларыгар, ону кытта толкуйдуур да дьоҕура сайдарыгар күүс-көмө буолар”, — диэн “Фаворит” кулууп хаһаайына Григорий Аммосов сырдатар.
Биир толору күннээх күрэхтэһии түмүгүнэн эдэрдэргэ бастакы миэстэ Амма Наахараттан Иван Пахомов, иккис миэстэ Бөтүҥтэн Егор Егоров, үһүс миэстэ Болугуртан Сандал Кожуров уонна 2-Чакыртан Семен Григорьев буоллулар. Бэтэрээннэргэ кыайыылаах үрдүк аатын Константин Максимов (Амма) ылла. Иккис миэстэҕэ Михаил Неустроев (Амма) уонна үһүс миэстэҕэ Алексей Григорьев (2-Чакыр) уонна Амматтан Петр Гермогенов таҕыстылар.
“Амма олоҕо” хаһыат