Бэҕэһээ “Фаворит” бильярд кулуубугар бу оонньуунан үлүһүйээччилэр сылы түмүктүүр күрэхтэһиигэ илин-кэлин түһүстүлэр.
Быйылгы сезону сабар киирсиигэ Сатаҕай, Алтан, Болугур, Чакыр уонна Амма нэһилиэктэриттэн кэллилэр. Икки бөлөҕүнэн хайдыһан оонньоотулар. Эдэрдэргэ бастакы миэстэни Өнньүөстэн Иван Пахомов ылла. Пахомов быйыл бааттаах сыла. Бу күһүн нэһилиэктэр икки ардыларыгар ыытыллар спартакиадаҕа нэһилиэгин аатын дьоһуннук көмүскээн эмиэ кыһыл көмүс мэтээл кэтэн турар. Иккис миэстэни Сатаҕайтан Петр Соловьев илдьэ барда. Итиэннэ үһүс бочуоттаах миэстэлэри Алтантан Эрхаан Пахомов уонна Чакыртан Сэмэн Григорьев ыллылар.
Бэтэрээннэргэ бэрт эриһиилээх оонньууларга болугурдар күннэтилэр. Үс бириистээх миэстэни ылан аҥардастыы аатырдылар. Финалга Устинов икки Кисинянов икки кииристилэр. Ол гынан, түмүккэ уопутунан тутум курдугунан чорбойон Иван Кисинянов бастакы миэстэҕэ таҕыста. Кисинянов быйыл эмиэ дьолуолаах дьыла, ааспыкка “Фаворит” кулууп үбүлүөйдээх турнирын хаардыы хааман тэҥнээҕин булбатаҕа. Онон иккис миэстэ Петр Устиновка тигистэ. Үһүс миэстэ эмиэ Болугуртан Савва Антипин уонна Амматтан Константин Максимов буолла.
Олег ЕГОРОВ.