Амматааҕы Ф. Потапов аатынан норуот айымньытын дьиэтигэр халыҥ эр киһи кууркатын тигиигэ босхо маастар- кылаас ыытылынна. Маастар кылааһы “Илии сылааһа” уопсастыбаннай хамсааһын “Кыыс Амма” диэн Амматааҕы филиалын салайааччыта Анфиса Федорова ыытта.
Кыһыҥҥы уһун өрөбүллэри туһалаахтык атаарарга “Кыыс Амма” түмсүү салайааччыта Анфиса Федорова көҕүлээһининэн икки күн устата эр киһи халыҥ кууркатын тигиигэ маастар-кылаас буолла. Манна кыттааччылар бэйэлэрэ тутан-хабан, кырыйан, икки күн иһигэр бэртээхэй диэн кууркалары тиктилэр.
Далбардар ортолоругар Амма нэһилиэгин олохтооҕо Игорь Быстров кэлэн эмиэ кыттан, сатабыллаахтык иистэнэрин көрдөрдө. Бу икки күҥҥэ кини куурка тигиитин албастарыгар үөрэннэ. Маастар-кылаас түмүгүнэн кэлэн үөрэммит дьон бэйэлэрэ дьиэлэригэр куурканы хайа баҕарар тигэр кыахтары ыллылар. Тигиллибит бэлэм кууркалар анал байыаннай дьайыыга кытта сыалдьар буойуоннарбытыгар барыахтара.
“Биһиги түмсүүбүт маннык маастар кылаастары хаһыс да төгүлүн ыытар. Бу иннинэ өссө Бөтүҥҥэ баар түмсүүбүт чилиэннэригэр тахсан ыыппыппыт. Онон билигин кинилэр хайа баҕарар сылаас куурканы тигэллэр. Кыһыҥҥы өрөбүллэр уһуннар. Сынньалаҥ күн элбэх. Ону туһалаахтык атаарар инниттэн тохсунньу 4-5 күннэригэр маастар кылаас ыытан дьон кэлэн дьарыктанна. Манна тигиллибит кууркаларбытын анал байыаннай дьайыыга кытта сылдьар уолаттарбытыгар ыытыахпыт. Манна кинилэр уоппускаҕа кэлэ сырыттахтарына эмиэ бэйэлэригэр кэтэрдэн ыытааччыбыт. Матырыйааллары өрөспүүбүүкэтээҕи “Илии сылааһа” хамсааһын ыытар”, — диэн Анфиса Алексеевна этэр.
Бу курдук олоххо көхтөөх, тарбахтарыгар талааннаах уран иистэнньэҥ далбардар көмөлөрүнэн бэрт туһалаах маастар-кылаас буолла. Кыттааччылар уопуттаах маастартан куурка тигиитин кистэлэҥнэрин да биллилэр, дойдубутун көмүскүү сылдьар уолаттарбытыгар да күүс-көмө буоллулар.
“Амма олоҕо” хаһыат.