Амма нэһилиэгэр түөлбэнэн үлэ кэнники сылларга биллэ сайынна. Араас таһымнаах Граннарга кыттан олорор сири тупсарыыны, субуотунньуктары сэргэ олохтоохтор киэргэтии үлэтигэр көхтөөхтүк кытталлар. Оттон нэһилиэк биир саамай улахан иэннээх түөлбэтэ – “Хардыы” олохтоохторо өрөбүл күннэри баттаһа көҕөрдүү үлэтин ыыттылар.
Оҕо аймах тоҕуоруһа оонньуур балаһаакканы олохтоохтор сибэккинэн симиир буолбуттара ыраатта. Нэһилиэнньэ күүһүнэн балаһаакка сотору-сотору кырааскаланан, өрөмүөннэнэн өрө тардыллар буолан сынньанааччылары угуйар. Киэһэтин манна оҕолор эрэ буолбакка, улахан дьон сынньана элбэхтик кэлэллэр.
“Хардыы” түөлбэ оҕо оонньуур-спортивнай балаһаакката олохтоох көҕүлээһиннэри өйүүр бырагыраамаларга кыттыы үтүө өрүтүн биир чаҕылхай холобура буолар. Олохтоохтор өрүү көрө-харайа, хомуйа, өрөмүөннүү, тупсара сылдьар буоланнар харыстабыллаах сыһыан баара харахха быраҕыллар.
“Амма олоҕо” хаһыат.