Хатыламмат куолаһа сүрэхпитигэр хаалыа

Муус устар 2 күнүгэр Амма улууһа эрэ буолбакка, бүтүн Сахабыт сирэ барыта курутуйда. Бу күн хатыламмат ураты куоластаах ырыаһыппыт, аммалар баар суох биир иннибитигэр уктар, киэн тутта ааттыыр киһибит, РФ  уонна СӨ үтүөлээх, СӨ норуодунай  артыыската, Былатыан Ойуунускай аатынан Судаарыстыбаннай бириэмийэ лауреата, Амма улууһун, Эмис нэһилиэгин бочуоттаах олохтооҕо, Суорун Омоллоон аатынан Опера уонна балет тыйаатырын сүрүн солистката, үгүс аан дойдутааҕы музыкальнай  күрэхтэр лауреаттара Нина Николаевна Чигирева ыарахан ыарыыттан күн сириттэн күрэннэ.


Нина Николаевна Чигирева 1954 сыллаахха сэтинньи 15 күнүгэр Эмис нэһилиэгэр төрөөбүтэ. Талааннаах ырыаһыт киһи быһыытынан олус боростуой, кимниин баҕарар күлэ-үөрэ кэпсэтэр үтүө киһи этэ. Нина Николаевна аан дойду биллэр тыйаатырдарын сценатыгар ыллаабыта. Новосибирскай консерваториятыгар үөрэнэ сылдьан консерватория историятыгар аан бастакынан XI Бүтүн Сойуустааҕы (билигин Аан дойдутааҕы) М. Глинка аатынан оччотооҕу ССРС опернай ырыаһыттарын саамай биллэр музыкальнай күрэхтэригэр лауреат үрдүк аатын ылбыта. Үөрэҕин бүтэрэн кэлиэҕиттэр,  1987 сыллаахтан Суорун Омоллоон аатынан Опера уонна балет тыйаатырыгар сүрүн солистканан үлэлээн кэллэ. Бу кэм устатыгар кини хатыламмат меццо-сопрано куолаһынан көрөөччүлэрин угуттаабыта. Нина Николаевна алыптаах куоалаһынан араас партияларга сүрүн оруолу толорон араас таһымнаах элбэх конкурстарга да, гастролларга да сылдьыбыта. Кини  Сузуки («Чио-Чио-Сан» Дж. Пуччини), Полина и Миловзор («Пиковая дама» П.И. Чайковскай), Мамаша Кураж («Мамаша Кураж» С. Кортеса), Мать («Сын солнца» А. Созонова), Күн Күбэй («Ньургун Боотур» М. Жирков, Г. Литинскай), Азучена («Трубадур» Дж. Верди), Маддалена («Риголетто» Дж. Верди), Ольга («Евгений Онегин» П.И. Чайковскай), Марина Мнишек («Борис Годунов» М. Мусоргскай), Кончаковна («Князь Игорь» А. Бородина), Любаша («Царская невеста» Н. Римского-Корсакова), Амнерис («Аида» Дж. Верди) уонна да атын партиялары үрдүк таһымнаахтык толорбута. Гастролунан Сахатын өрөспүүбүлүкэтин улуустарыгар барытыгар сылдьыбыта. Амматын, Эмиһин олус таптыыра. Хайа да түгэҥҥэ дойдутугар күүс-көмө буоларга бэлэм этэ. Саҥа кулууп бастакы сыбаайата түһэригэр кэлэн бэйэтин кэрэ куолаһынан бар дьонугар ыллаан, бэйэтин көмөтүн анал капсулаҕа уган барбыта.

«Нина Николаевна биһиги улууспут киэн туттуута этэ. Кини аата үйэлэр тухары улууспут историятыгар, кинини билэр, кини айар үлэтигэр сүгүрүйэр дьон сүрэхтэригэр  хаалыа.  Амма улууһун уонна тус бэйэм ааппыттан Нина Николаевна кэргэнигэр,  өрөспүүбүлүкэбит искусствотын үтүөлээх деятелигэр, Арассыыйа култууратын үтүөлээх үлэһитигэр Сергей Валентинович Чигиревка, уолугар Дмитрийга, сиэннэригэр уонна бары чугас дьонугар дириҥ кутурҕаммын тириэрдэбин «, — диэн этэр Амма улууһун баһылыга Степан Кузьмин.

Нина Николаевна ыллаабыт ырыалара, кини  хатыламмат кэрэ куолаһа саха дьонун, биир дойдулаахтарын сүрэҕэр хаалыа. Баар суох күндү киһибитин кытта бырастыылаһыы Дьокуускай куоракка муус устар 4 күнүгэр Суорун Омоллоон аатынан опера уонна балет тыйаатырыгар сарсыарда 10 чаастан, дойдутугар, киинэ түспүт сиригэр Эмис нэһилиэгэр Екатерина Захарова аатынан элбэх функциялаах кииҥҥэ муус устар 5 күнүгэр сарсыарда 10 чаастан ыытыллар. Бу туһунан Эмис нэһилиэгин дьаһалтата иһитиннэрэр.

Быдан дьылларга быраһаай, күндү хатыламмат куоластаах ырыаһыппыт Нина Николаевна, сахабыт  биир далбар хотуна. Ураты талааннаах ырыаһыппыт сырдык аата мэлдьи өйбүтүгэр-санаабытыгар, сүрэхпитигэр тыыннаах буолуоҕа…

“Амма олоҕо” хаһыат

Хаартыскалар: социальнай ситимтэн

Читайте дальше