Амматааҕы Ф. Потапов аатынан култуура киинигэр “Хомус алыптаах дорҕооно” диэн улуустааҕы хомусчуттар күрэхтэрэ ыытылынна. Бу күн хомуһу сэҥээрээччилэр хомусчут-импровизатор. СӨ култууратын туйгуна Туяра Жиркова сыыйа тардыы ньымаларыгар маастар-кылаас ыытта. Хомус түмэлэ кэлэн бэрт интэриэһинэй быыстапканы туруорда, хомус уустара кэлэн оҥоһуктарын атыылаатылар.
Хомусчуттар күрэхтэрэ икки бөлөҕүнэн арахсан ыытылынна. Ол курдук оҕолор, улахан дьон биирдиилээн уонна бөлөҕүнэн хомустаатылар. Кинилэри үс киһиттэн састааптаах дьүүллүүр сүбэ сыаналаата. Бэрэссэдээтэлинэн Дьокуускайтан СӨ култууратын туйгуна, хомусчут- импровизатор Туяра Жиркова үлэлээтэ.
“Наһаа үчүгэй күрэх буолла. Бу бастакытын туспа тэриллэн улууска ыытыллынна. Быйыл сайын буолбут Олоҥхо ыһыаҕыттан тирэх ылан күрэх тэриллибититтэн олус үөрэбин. Онон инникитин Аммаҕа хомус тардааччы элбиэ, сайдыа дии саныыбын уонна эрэнэбин. Маннык күрэхтэртэн саҥа талааннар тахсаллар, сорохтор кынат үүннэрэннэр өссө үрдүккэ салгыы бараллар. Күрэххэ элбэх хомусчут оҕо кэлбит. Бары сөбүлээн, үлүһүйэн дьарыктана сылдьаллара көстөр. Толоруу өттүгэр үчүгэйдэр. Арай инникитин кыттааччылар айымньы өртүгэрболҕомто ууралларыгар баҕарыам этэ. Онон салайааччылар судургу да буоллун айымньыны ааттыахтарын наада. Оҕолорго судургу ааттар барсаллар. Амма култууратын управлениета маннык хомуска болҕомто ууран күрэх тэрийбитигэр махтанабын”, — диэн Туяра Анатольевна күрэх туһунан сырдатта.
Бу күн Туяра Анатольевна кыттааччыларга уонна баҕалаах дьоҥҥо туһалаах сүбэлэри биэрэн, маастарыстыбатын көрдөрөн, сыыйа тардыы ньымаларыгар үөрэттэ. Ол кэнниттэн кыайыылаахтары наҕараадалааһын буолла.
“Кэскиллээх хомусчут анал аат” – Сэргэ Бэстэн Денис Максимов уонна Нонна Софронова, “Айымньылаах хомусчут” – Амматтан Сардаана Давыдова, “Саҥа саҕалааччы” – Камилла Эверестова, “Сэргэх хомусчут” – Мариэла Жиркова, “Дьоһуннаах хомусчут” – Леня Севастьянов, “Сэргэх хомусчут” – Эмма Неустроева, “Иэйиилээх хомусчут” – Айсена Чирикова, “Дорҕоонноох хомусчут” – Настя Назарова буоллулар.
3 үрдэл кыайыылааҕа Сандал Павлов – (Амма Наахара)
2 үрдэл кыайыылааҕа Алгыстаана Мартынова (Амма-Наахара)
1 үрдэл кыайыылааҕа Сатаҕайтан Сандаара Скрябина.
Оҕолорго бөлөҕүнэн толорууга “Кэскиллээх хомусчуттар” анал аат – Чакыртан “Кэскил бөлөх” –хө (сал. Татьяна Данилова) иҥэрилиннэ. 3 үрдэл кыайыылааҕа Покровкаттан “Ситии” бөлөх (сал. Мария Черкашина), 2 үрдэл кыайыылааҕа – А.А.Черемных аатынан оҕо искусствотын оскуолатын бөлөҕө (сал.Татьяна Томская, Ромина Федорова) уонна 1 үрдэл кыайыылааҕа Амма Наахараттан “Үрүйэчээн бөлөх” (сал. Туяра Мартынова) буоллулар.
Улахан дьоҥҥо соҕотохтуу толорууга “Өбүгэ ситимэ” анал Сэргэ Бэстэн Анастасия Михайловаҕа, “Иэйиилээх хомусчут” анал аат Амматтан Елена Ноеваҕа, “Дохсун хомусчут” Покровкаттан Петр Слепцовка, “Аныгы тэтим” анал аат эмиэ Покровкаттан Айыына Степановаҕа, “Айымньылаах хомусчут” анал аат Мээндигиттэн Семен Поповка, “Дьүрүскэн хомусчут” анал аат Чакыртан Татьяна Даниловаҕа, “Тэтимнээх хомусчут” анал аат Амма Наахараттан Иван Ефремовка туттарылынна.
3 үрдэл кыайыылааҕа Яков Деляев, (Мээндиги)
2 үрдэл кыайыылааҕа Туяра Мартынова (Амма-Наахара)
1 үрдэл кыайыылааҕа Ромина Федорова (Амма нэһилиэгэ).
Улахан дьоҥҥо бөлөҕүнэн толорууга “Өбүгэ дорҕооно” анал аат Покровкаттан “Трио” бөлөххө (сал. Айыына Степанова), “Аныгылыы тэтим” анал аат Болугуртан “Дайан” бөлөххө (сал. Вероника Иванова) иҥэрилиннэ.
3 үрдэл кыайыылааҕа Сэргэ Бэстэн “Дьүрүскэн” бөлөх (сал. Светлана Федотова)
2 үрдэл кыайыылааҕа Амматтан “Дьулҕан” бөлөх (сал. Татьяна Томская, Ромина Федорова)
1 үрдэл кыайыылааҕа Амматтан “Алыптаах дорҕоон” (сал. Анфиса Федорова).
Маны сэргэ күрэххэ бэлэмнээн аҕалбыт бастыҥ салайааччылары бэлиэтээтилэр. Ол курдук улахан дьон бөлөҕөр “Бастыҥ салайааччы” аатын Анфиса Федорова, онтон оҕолор бөлөхтөрүгэр Амма Наахараттан Туяра Мартынова ыллылар.
«Бэртээхэй тэрээһин буолла. Оҕолор хомустуулларын көрөн үөрдүм. Ол аата хомуспут, сахалар төрүт көрүҥмүт инникилээх эбит. Аҕалбыт хомуспун тардааччылар ыллылар. Маннык күрэхтэр салгыы бара турдуннар. Оччотугар хомуһу сэҥээрээччилэр, хомусчут оҕолор эбиллэн иһиэхтэрэ», — диэн этэр хомус ууһа Алексей Скрябин.
“Амма олоҕо” хаһыат