Кулун тутар 11 күнүгэр “Сардаана” оҕону сайыннарар киинигэр өрөспүүбүлүкэтээҕи “Хомуур күрэххэ” талыы улуустааҕы түһүмэҕэ буолан ааста. Барыта 13 уһуйаантан 41 оҕо киирэн икки категориянан күөн көрүстүлэр, бэйэлэрин тургуттулар. Кимнээх сүүмэрдэнэн улуус чиэһин көмүскүүр буоллулар?
Күрэҕи Амма нэһилиэгин “Хатыҥчаана” уһуйаана көҕүлээн, иилээн-саҕалаан ыытта. Талыы күрэххэ бастакы категорияҕа уһуйаан улахан саастаах оҕолоро — кыргыттар, уолаттар тус-туспа, иккис категорияҕа доруобуйаларынан хааччахтаах оҕолор эмиэ уол, кыыс диэн арахсан күрэхтэстилэр. Күрэхпитигэр ыалдьыттарынан ХИФУ Физкультура уонна спорт институтун научнай-чинчийэр үлэҕэ директоры солбуйааччы, п.н.к, доцент Никита Васильевич Никифоров, “Модун” спортивнай комплекс программнай-методическай отделын салайааччыта Михаил Михайлович Ершов буоллулар. Бу күрэх сыалынан “Хомуур күрэх” оонньууну кыра саастаах оҕолорго, төрөппүттэргэ пропагандалааһын, оҕо эт-хаан өттүнэн сайдарыгар, сымса, түргэн, тулуурдаах буоларыгар, илии-атах былчыҥнара сайдарыгар, быһа холоон көрөргө, учуоттаныы буолар.
Күрэхтэһээччилэри “Сардаана” оҕону сайыннарар киинин оҕолоро сэргэх ырыаларынан, үҥкүүлэринэн эҕэрдэлээтилэр. Күрэхтэһии икки хонуунан көхтөөхтүк барда. Биирдиилээн күрэххэ бастакы категорияҕа уолаттарга 1 миэстэни “Хатыҥчаана” уһуйаантан Решетников Миша (тренер Седых Р.С.), 2 миэстэ Сатаҕайтан Д.Г. Готовцева аатынан оҕону сайыннарар киин иитиллээччитэ Гуляев Вадим (тренер Федорова Е.П.), 3 миэстэ Бөтүҥнээҕи ”Мичээр” оҕону сайыннарар киинтэн Давыдов Эрсан (тренер Окоемова Т.П.), кыргыттарга 1 миэстэни Эмистэн “Чуораанчык” уһуйаан иитиллээччитэ Ноговицына Ильяна Ай Куо (тренер Ноговицына Н.Н.), 2 миэстэ Сатаҕайтан Д.Г. Готовцева аатынан оҕону сайыннарар киин иитиллээччитэ Васильева Дайаана (тренер Федорова Е.П.), 3 миэстэ – Алтантан “Кэскил” уһуйаан иитиллээччитэ Стручкова София (тренер Харлампьев А.А.). Иккис категорияҕа уолаттарга 1 миэстэ “Хатыҥчаана” уһуйаантан Загаруля Юра (тренер Седых Р.С.), 2 миэстэ “Сардана” уһуйаантан Пестерев Эрхан (тренер Трофимова Н.М.), 3 миэстэ Болугуртан “Колосок” уһуйаантан Саввин Алгыс (тренер Леонтьева М.Д.), кыргыттарга 1 миэстэ “Хатыҥчаана” уһуйаантан Кривошеина Алиса (тренер Седых Р.С.), 2 миэстэ “Радуга” уһуйаантан Кралина Риана (тренер Чупрова О.А.), 3 миэстэ “Сардаана” уһуйаантан Уварова Мия (тренер Трофимова Н.М.) буоллулар.
Уопсай хамаанданан түмүккэ 1 миэстэҕэ “Хатыҥчаана” уһуйаан хамаандата (тренер Седых Р.С.), 2 миэстэҕэ Эмистэн “Чуораанчык” уһуйаан хамаандата (тренер Ноговицына Н.Н.), 3 миэстэҕэ “Радуга” уһуйаан хамаандата (тренер Чупрова О.А.) таҕыстылар. “Хомуур күрэҕэ” бэрт умсугутуулаах, тыҥааһыннаах көрүҥ эбит. Күрэхпит таһымын ХИФУ-тан педагогическай наука кандидата, “Модун” СК национальнай оонньуулар көрүҥнэрин салайааччыта кыттан үрдэттилэр. Инники өттүгэр кыра саастаах оҕолор эт-хаан өттүнэн сайдыыларыгар сахалыы национальнай оонньууларбыт дьайыыларын учуонайдар көрөн-үөрэтэн дакаастыыллара сабаҕаланар.
Эмма ДАВЫДОВА, улуустааҕы үөрэх управлениетын сүрүн исписэлииһэ