Амматааҕы Ф. Потапов аатынан норуот айымньытын дьиэтигэр «Дошкольное образование в Амгинском улусе: от традиции к инновации» диэн саҥа кинигэ сүрэхтэниитэ истиҥ иһирэх эйгэҕэ ааста. Кинигэ Арассыыйаҕа педагог уонна наставник, Саха сиригэр Үлэ сылыгар, Амма улууһугар историческай нэһилиэстибэ уонна дойдуга бэриниилээх буолуу сылыгар тахсыбыта бэйэтэ туспа уратылаах буолар.
Кинигэни улуустааҕы үөрэх управлениетын уопсай үөрэхтээһин уонна мониторинг салаатын сүрүн исписэлииһэ Вера Чупрова уонна информационнай-методическай салаатын сүрүн исписэлииһэ Эмма Давыдова бэлэмнээн таһаардылар. Кинигэни Дьокуускайдааҕы М.К. Аммосов аатынан ХИФУ норуоттар тылларын уонна култуураларын үнүстүүтүн саха литэрэтиирэтин хаапыдыратын кабинетын сэбиэдиссэйэ Василиса Шишигина эрэдээксийээлэтэ. Сүрэхтэниигэ эҕэрдэ тылы улуус баһылыгын социальнай боппуруостарга солбуйааччы Нюргуяна Илларионова, үөрэх управлениятын начальнига Юрий Шишигин, үөрэх үлэһиттэрин идэлээх сойуустарын улуустааҕы кэмитиэтин бэрэссэдээтэлэ Прокопий Бытыров, Дьокуускайдааҕы М.К. Аммосов аатынан ХИФУ бэрэпиэссэрэ, педагогика билимин дуоктара, РФ үрдүкү профессиональнай үөрэҕириитин бочуоттаах үлэһитэ, СӨ үөрэҕириитин үтүөлээх үлэһитэ Мария Прокопьева, СӨ үөрэҕириигэ, иитиигэ уонна эбии үөрэхтээһиҥҥэ судаарыстыбаннай бэлиитикэ Департаменын кылаабынай исписэлииһэ Туйаара Васильева, кинигэ эрэдээктэрэ Василиса Шишигина, СӨ үөрэҕириитин үтүөлээх үлэһитэ, педагогическай үлэ бэтэрээнэ Елена Колосова, оҕо сайдар киинэ — «Чэчир» уһуйаан МБДОУ сэбиэдиссэйэ, СӨ оскуола иннинээҕи үөрэхтээһин сайдыытыгар кылаатын иһин” бэлиэ хаһаайына Саргылана Данилова, педагогическай үлэ бэтэрээнэ, СӨ үөрэҕириитин туйгуна, оҕоҕо аналлаах элбэх кинигэ ааптара Дария Васильева эттилэр.
Бу бэлиэ күн иитээччилэр күннэрэ бэлиэтэнэн бастыҥ үлэһиттэр наҕараадалары туттулар. Ол курдук уопсай үөрэхтээһин уонна мониторинг салаатын сүрүн исписэлииһэ Вера Чупрова, Амма улууһун үөрэх управлениятын информационнай салаатын сүрүн исписэлииһэ Эмма Давыдова, Өнньүөстээҕи «Дуораанчык» МБДОУ сэбиэдиссэйэ Полина Кононова, «Сардаана» оҕо уһуйаанын сайыннарыы киин сэбиэдиссэйэ Лилия Степанова Арассыыйа уопсастыбаннай палататын Махтал суругунан, «Радуга» уһуйаанын сэбиэдиссэйэ Вера Конникова, «Кэнчээри» уһуйаанын сэбиэдиссэйэ Галина Лугинова, “Хатыҥчаана” уһуйаан сэбиэдиссэйэ Саргылана Петрова оскуола «Российская семья» национальнай уопсастыбаннай кэмитиэт Махтал суругунан наҕараадаланнылар. Кинигэ сүрэхтэммитин туоһулаан аалай лиэнтэни быстылар. Ааптардар уһуйаан салайааччыларыгар саҥа буруолуу сылдьар кинигэлэрин бэлэх ууннулар. Бырааһынньык кыттыылаахтарыгар Амма 1 №-дээх орто оскуолатын маҥнайгы кылааһын үөрэнээччитэ Катя Никонова “Кинигэлэр”, “Сардаана” оҕо уһуйаанын бэлэмнэнии бөлөҕүн иитиллээччитэ Аделина Марсанова “Сааскы күөх сарсыарда”, СӨ үтүөлээх артыыһа Александр Ушницкай “Сахам сирэ барахсан” диэн ылбаҕай ырыаларын бэлэхтээтилэр.
» Кинигэ ааҕааччы киэҥ араҥатыгар ананар. Амма улууһугар оскуолаҕа киириэн иннинээҕи үөрэхтээһин историята 30-с сыллартан саҕалаан, колхозтаахтар оҕолоругар оҕо балаһааккалара арыллыахтарыттан ыла саҕаламмыта. Кэнники уон сылга оскуола иннинээҕи иитии систематыгар улахан уларыйыылар таҕыстылар. Оскуола иннинээҕи саастаах оҕолору иитии концепцията уларыйда, маны сэргэ педагогическай процесс элбэх бырагыраамата оҥоһулунна, оскуола инновационнай ньымалара уонна технологиялар үөскээтилэр, дьиэ кэргэн уонна оҕо уһуйаанын приоритеттарыгар көрүү уларыйда. Кинигэбитигэр улууспутугар историяттан саҕалаан бары уларыйыылары киллэрэн туран бэлэмнээтибит. Биллэн туран история олус киэҥ. Ол да буоллар саамай сүрүннэрин киллэрдибит. Элбэх хаартыскалар бааллар” – диэн кинигэни бэлэмнээн таһаарыыга үлэлээбит Эмма Давыдова санаатын үллэһиннэ.
Бу күн өссө үөрүүлээх сонуннары иһитиннэрдилэр. Ол курдук «Арассыыйаҕа бастыҥ оҕо уһуйаана — 2023» диэн Бүтүн Арассыыйатааҕы куонкурус кыайыылааҕынан Амматааҕы «Радуга» оҕо сайдар киинэ (сэб. Вера Конникова) уонна Сатаҕайдааҕы Д.Г. Готовцева аатынан оҕо сайдар киинэ (сэб. Елена Скрябина) кыайыылаах аатын ыллылар.
Артем ОСИПОВ