Саргылаах саҥа дьылы көрсө Бөтүҥнээҕи “Мичээр” оҕо сайдар киинин иитиллээччилэрэ ыраах, дойдутун көмүскүү сылдьар Айаал Филипповтан бэлэх тутан үөрдүлэр. Айаал оҕо сылдьан иитиллибит уһуйаанын элбэх оҕолоох 15 ыалыгар Саҥа дьылынан бэлэҕин ыытан кырачааннары эрэ буолбакка, бэйэтин иитээччилэрин эмиэ үөртэ.
“Саҥа дьылы көрсө биһиги уһуйааммыт кырачаан иитиллээччилэригэр анал байыаннай дьайыыга сылдьар биир дойдулаахпыт Филиппов Айаал Иванович ыраах да сырыттар үөрүүнү бэлэхтээтэ. Ол курдук элбэх оҕолоох 15 ыалга үтүө санаатынан минньигэс бэлэхтэри ыытта. Айаал кыра сылдьан биһиги уһуйааммытыгар сылдьыбыта. Айаалбыт төһө да сыллар аасталлар, уһуйаанын истиҥник саныырыттан, умнубатыттан биһиги олус үөрэбит уонна этэҥҥэ эргиллэн кэлэригэр күүстээх баҕа санаабытын этэбит. Төрөппүттэрбит олус үөрдүлэр уонна киниэхэ «оҥорбут үтүөҥ үгүс элбэх үтүөнэн эргиллэн тиийдин уонна түргэнник этэҥҥэ эргиллэн кэлэргэр баҕарабыт» диэн баҕа санааларын тириэрдэллэр”, — диэн “Мичээр” ОСК дириэктэрин иитэр үлэҕэ солбуйааччы Татьяна Сутакова сырдатта.
“Амма олоҕо” хаһыат