Болугурдааҕы «Колосок» уһуйаан уонна олохтоох библиотека үгэскэ киллэрбит «Ааҕар хонуу» хоһоону уус-ураннык ааҕыы күрэҕин оскуола иннинээҕи саастаах оҕолорго үһүс сылын тэрийэн ыыттылар.
Күрэх быйыл Арассыыйаҕа Дьиэ кэргэн, өрөспүүбүлүкэбитигэр Оҕо саас сылларыгар уонна Константин Ильич Сосин 80 сааһыгар ананна. Бу үөрүүлээх күнүнэн уһуйаан сэбиэдиссэйэ Афанасьева Марфа Васильевна эҕэрдэ тылын уонна кыттааччы оҕолорго ситиһиини баҕарда.
«Ааҕар хонуу» күрэспит сыала-соруга ийэ тыл уус-уран күүһүн, кэрэтин, оҕоҕо кыра сааһыттан иҥэрии буолар.
Быйылгы күрэскэ 3-6 саастаах уопсайа 41 оҕо кытынна. Дьүүллүүр сүбэҕэ өр сыл уһуйааҥҥа үлэлээбит бэтэрээн үлэһит Елизавета Максимовна Алексеева, иитээччи Саргылана Ивановна Кононова, бибилэтиэкэр Марианна Иннокентьевна Егорова уонна алын кылаас учуутала Виктория Степановна Алексеева үлэлээтилэр.
Дьүүллүүр сүбэ быһаарыытынан маннык түмүк таҕыста.
Кыра бөлөххө: 1 миэстэ Константинов Дима, 2 миэстэ Карамзина Яна, 3 миэстэ Евсеев Эрхан. Орто бөлөххө: 1 миэстэ Филиппова Күбэйэ, 2 миэстэ Егорова Мичийэ, 3 миэстэ Софронов Ньургун.
Улахан бөлөххө: 1 миэстэ Афанасьев Эрсан, 2 миэстэ Макарова Лилия, 3 миэстэ Никитин Костя.
Бэлэмнэнии бөлөххө: 1 миэстэ Платонова Виталина, 2 миэстэ Березкина Сайнаара, 3 миэстэ Евсеев Арчылан буоллулар.
Бары кырачаан хоһоон ааҕааччы оҕолор туоһу суруктарынан, сэмэй бэлэхтэринэн наҕараадаланнылар. Онтон уһуйааммыт бэтэрээннэрэ туруорбут анал бириистэрин уонна «Кэскиллээх ааҕааччы» анал ааты бэлэмнэнии бөлөх иитиллээччитэ Филиппова Нарыйаана ылла.
Күрэхпит кыттыылаахтарын барыларын эҕэрдэлиибит, инникитин да ситиһиилэр кэлэ турдуннар.
Бу күн өссө уһуйаан кыра бөлөх оҕолоро «Мин дьиэ кэргэним» диэн ааттаах хаартыска, онтон улахан бөлөх оҕолоро уруһуй быыстапкатын туруордулар.
Тэрээһиммит спонсордарыгар, уһуйааммыт бэтэрээннэригэр уонна олохтоох библиотека үлэһиттэригэр улахан махтал тыллары тириэрдиэхпитин баҕарабыт.
Ольга Петрова.