Ийэлэр маастар-кылаастарга элбэххэ үөрэннилэр

Амма Наахара нэһилиэгэр Күн күбэй Ийэ күнүн чэрчитинэн ааһан эрэр нэдиэлэҕэ биэс күн супту талааннаах Далбар хотуттар маастар кылаастары ыыттылар. «Түмэн» сынньалаҥ киин уус-уран салайааччыта Светлана Захарова этии киллэрбитин өйөөн тэрээһиннэр олус табыллан буоллулар.

Маастар-кылаастарга  Екатерина Унарова брошь тигэн оҥорууга, Туяра Романова ыаҕайа тигиигэ,  Ольга Устинова фотобокс оҥорууга, Клавдия Павлова капор уонна свитшоп тигиитигэр,  Светлана Алексеева хартыынаны уруһуйдаан холонууга нэһилиэк ийэлэрин үөрэттилэр. Барыта 28 ийэни хабан таһаарыылаах үлэ нэдиэлэтэ элбэх саҥаны, сатабылы ийэлэргэ бэлэх уунна. Тэрээһин үлэ чааһыгар ыытыллыбыт буолан үксүн дьиэҕэ олорор ийэлэр, эбэлэр сырыттылар.

 

 «Маастар кылаастарга сылдьан олуһун астынным. Ыыппыт кыргыттар бары талба талааннаах эдэркээн ийэлэр. Саҥаны Ольга Устинова фотобокс маастар кылааһыттан биллим. Кини элбэх уокка холбонор инструменнарынан туттар эбит. Үчүгэй баҕайытык быһан, көрдөрөн биэрдэ. Шкатулканы оҥорго этабынан схемалаан, суоттаан баран барытын быһан, шкурканан аалан, шлифовка оҥорон, малярнай скотч көмөтүнэн туттаран, тоһоҕонон саайан, кырааскалаан, шпаклепканан орнамент түһэрэн уруһуй түһэрэрин сөҕөн, холоннум. Кыраасканы сөпкө дьүөрэлээн киэргэтэрбэр сүбэ ыллым. Үлэм түмүгүн көрөн үөрэн, саҥа оҥоһукпуттан дуоһуйдум аҕай. Бу тэрээһин биһигини ийэлэри түмпүтэ олус үчүгэй», — диэн «Дуораанчык» уһуйаан тутаах үлэһитэ, тапталлаах кэргэн, иһирэх ийэ,  үс сиэн элэккэй эбэтэ Екатерина Михайлова санаатын үллэстэр.

Көхтөөх үлэ кэннэ оҥоһукка, иискэ, уруһуйга дьиэ кэргэҥҥэ ылбыт үөрэҕи туһаныы ыытыллара кэрэхсэниэ. Саха дьахтара барахсан сатабылын оҕолоругар, сиэннэригэр үөрэтэн дьоллонуо. Дьиэ иһигэр оҕоҕо уҕараабат тапталын, сиэҥҥэ арчылыыр абылаҥын, чугас дьонугар сылаас сыһыанын, истиҥ мичээрин бэлэхтиэ!

Ирина КОРЯКИНА-ОЛЕСОВА

Читайте дальше