Бүгүн өрөспүүбүлүкэ Ил Дархана нэһилиэнньэни кытта быһа эпииргэ тахсан боппуруостарга эппиэттиир. Бу маннык кэпсэтиини дьон-сэргэ күүтэр. Тоҕо диэтэр бэйэтин кыһалҕалаах, интэриэһиргиир боппуруостарыгар быһаччы эппиэти үрдүкү салайааччыттан тута ылар кыахтанар. Өрөспүүбүлүкэ күнүн көрсө быһа эпииргэ Амма улууһуттан Аан дойду чемпиона, СӨ мас тардыһыытыгар федерациятын Президенэ, улуус дьокутаата Анатолий Баишев кыттан икки суол боппуруоһу биэрдэ. Кини быһа эпииргэ бэйэтэ уонна оҕолору дьарыктыыр дьиэтээҕи спортсаалатыттан таҕыста.
Анатолий Анатольевич аммалар бу кэнники сылларга улуус олохтоохторун эрэ буолбакка, Аммаҕа кэлэр бары өрөспүүбүлүкэ олохтоохторун долгутар боппуруоһу – “Амма” региональнай айан суол оҥоһуутун туһунан биэрдэ уонна Айсен Сергеевыһы иккис төгүлүн дьон-сэргэ итэҕэлин ылбытынан истиҥник эҕэрдэлээтэ. Маныаха Айсен Сергеевич Баишевтар дьиэ кэргэттэрин историяҕа өссө суох ситиһиилэринэн, биир дьиэ кэргэнтэн үс Аан дойду чемпиона буолбуттарынан эҕэрдэтин тириэртэ уонна “Амма” региональнай суол боппуруоһун үчүгэйдик билэрин, суол туругун тупсарыыга үлэ бара турарын эттэ. Быйыл бу өттүгэр суолга үлэ барда. Инникитин үлэ урукку сыллардааҕар өссө тэтимнээхтик барыаҕын, сыл аайы уонунан килэмиэтири оҥоруохтарын бэлиэтээтэ. Ил Дархан салгыы бу боппуруоһунан дьарыктаныахпыт, ону сэргэ Амма нэһилиэгин иһинээҕи уулуссалары оҥорууга эмиэ үлэ барыа диэтэ. Айан суолларын оҥорууга “Куттала суох уонна хаачыстыбалаах массыына суоллара” диэн национальнай бырайыак тирэх буолуо диэн эттэ. Онон төһө да билигин суолга ыарахаттар баалларын иһин, суолу оҥорооччулар “Амма” айан суолун чөлүгэр түһэриэхтэрэ диэн эрэлин биллэрдэ. Маны тэҥэ бастыҥ мадьыны өрөспүүбүлүкэ мас тардыһыытын федерациятын Бэрэсидьиэнэ буоларынан, кинилэр этиилээхтэрин, онон тус приемнуон сөп дуо диэн ыйыталаспытын Айсен Сергеевич көрсөргө, санааларын истэргэ бэлэмин иһитиннэрдэ.
«Амма олоҕо» хаһыат